Премиерот Христијан Мицкоски и официјално треба да го претстави проектот за ветерен парк кој ќе се гради на тромеѓето меѓу општините Штип, Карбинци и Радовиш, вреден меѓу 400 и 450 милиони евра
Утре се очекува и официјално да биде промовиран првиот голем проект на новата влада предводена од премиерот Христијан Мицкоски. Станува збор за парк на ветерни електрани, вреден неколку стотици милиони евра, кој треба да се гради во источниот дел на земјава.
„Паркот ќе биде изграден на тромеѓето меѓу општините Карбинци, Штип и Радовиш и ќе има вредност меѓу 400 и 450 милиони евра. Утре ќе го видите инвеститорот, ќе имаме заеднички настан. Тоа претставува значаен проект во делот на енергетското портфолио не само на овој крај, туку и на државата во целост, кој значително ќе го подобри перформансот на енергетските капацитети на државата. Значајно е дека за овој проект нема специјален закон, ниту загарантирана цена, туку инвеститор којшто ќе инвестира и производот ќе го пласира на слободниот пазар и тој пазар ќе диктира дали ќе биде за извоз или ќе заврши овде во Македонија. Она што е многу важно, за граѓаните и БДП ќе донесе дополнителни 100 милиони евра годишно. Значи, македонскиот ветер ќе донесе нови 100 милиони евра на годишно ниво и вакви проекти ќе има низ целата територија на државата“,
изјави премиерот Мицкоски за време на денешната посета на Штип каде присуствуваше на поставување камен-темелник на нова спортска сала.
Зад инвестицијата, според најавите, стои „Алказар енерџи“ – одржлив инфраструктурен фонд фокусиран на средни по големина проекти со обновлива енергија.
„Алказар енерџи“, според информациите објавена од самата организација, има седиште во Луксембург, со советодавен тим во Дубаи. Фондот, на чие чело е соосновачот Даниел Калдерон, се фокусира на проекти поврзани со обновлива енергија на пазари во развој во Европа и во Турција.
Досега оваа организација имала една успешна инвестиција АЕП-1 во Северна Африка и Блискиот Исток, која во 2021 била откупена од кинеската „China Three Gorges South Asia Investment Ltd”, чии пак акционери, според соопштение на „Алказар енерџи“, во тој момент се и „International Finance Corporation“ и „Silk Road Fund“. „Silk Road Fund“ e проект зад кој стои кинеската држава.
Фондот сега собира средства за втора голема инвестиција во истата сфера – обновлива енергија за што, според текст објавен во „Ројтерс“, има поддршка од инвеститори од САД и од Европа.
Според најавеното, на утрешната промоција на оваа инвестиција на фонд кој е домицилен во Луксмебург, има тим во Дубаи, треба да настапи и неговиот прв човек, Даниел Калдерон.