Директорот на американската Централна разузнавачка агенција (ЦИА) Вилијам Барнс исто така е во Каиро за да се приклучи во преговорите, на кои ќе посредуваат Египет и Катар
Во Каиро денеска почнаа, а утре ќе продолжат, преговорите за прекин на огнот во Појасот Газа и ослободување на дел од заложниците кои Хамас ги зеде при нападот врз Израел на 7 октомври минатата година, пренесуваат светските агенции, повикувајќи се на претставник на палестинското исламистичко движење.
Делегацијата на Хамас денеска пристигна во египетската престолнина од Доха, каде е седиштето на политичкото раководство на движењето. Директорот на американската Централна разузнавачка агенција (ЦИА) Вилијам Барнс исто така е во Каиро за да се приклучи во преговорите, со кои ќе ги посредуваат Египет и Катар.
Тахер Ал-Ноно, кој е советник на лидерот на Хамас Исмаил Ханије, рече дека преговорите се интензивирани со египетските и катарските посредници и дека Хамас ги разгледува предлозите „со целосна сериозност и одговорност“.
Тој, сепак, го повтори барањето договорот да вклучува израелско повлекување од Газа и крај на војната, услови кои Израел претходно ги отфрли.
„Секој договор што треба да се постигне мора да ги вклучи нашите национални барања, целосен и траен прекин на агресијата, целосно повлекување на окупацијата од Појасот Газа, враќање на раселените во нивните домови без ограничувања и вистинска размена на затвореници“,
изјавил Ноно за Ројтерс.
Пред да замине за Каиро, за да ги продолжи разговорите за можен договор за прекин на борбите во Газа, делегацијата на исламската милитантна група Хамас преку сооштение рече „одиме во Каиро во истиот дух за да постигнеме договор“.
Израелски официјален претставник, пренесува Ројтерс, сигнализираше дека основната позиција на Израел е непроменета, велејќи дека „под никакви околности“ нема да се согласи да ја заврши војната со договор за ослободување на заложниците.
Тој изјави дека палестинскиот Хамас „ја блокира секоја можност за договор за прекин на огнот“, инсистирајќи на целосен прекин на војната во Појасот Газа, за време на разговорите во Каиро во присуство на меѓународни посредници.
„Информациите според кои Израел прифатил да ја прекине војната, како дел од договорот за размена на затвореници, или дека Израел ќе дозволи посредување за да гарантира дека војната ќе престане, се неточни. Досега Хамас не се откажа од барањето за прекин на војната, со што ја блокираше можноста за постигнување договор за прекин на огнот“,
изјавил функционерот за АФП, кој не сакал да биде именуван.
Претставник на Хамас изјави за „Франс прес“ дека нема напредок во денешните преговори во Каиро, со учество на посредниците Египет, Катар, САД.
Тој додаде дека денешните преговори се завршени и дека утре ќе се одржи нова рунда.
Катар и Египет учествуваат во преговорите за прекин на огнот, кој накратко беше постигнат во ноември. Преговорите се во застој, пишува Ројтерс, поради барањата на Хамас да се обезбеди крај на седуммесечната израелска офанзива врз Газа.