Сопствениците на земјиштето на просторот кај хотелот „Холидеј ин“ во најстрогиот центар на Скопје наскоро ќе почнат со градење на три згради со катност од 15, 20 и 25 ката, објави СДК.мк.
Според порталот, фирмата „МГ Фешн“ и Македонската православна црква, преку фирмата „Обновители“, уплатиле комуналии во висина од 150 милиони денари или 2,43 милиони евра и тоа 60 отсто на Град Скопје (1,4 милиони евра) и 40 отсто на Општина Центар (1 милиони евра). Претходно, Општина Центар им го одобри идејниот проект за објектите.
Со тоа, сега останува уште инвеститорите да добијат одобрение за градба и потоа слободно да градат на овој последен слободен простор во центарот на Скопје. Мораториумот за градење во централното градско подрачје повеќе не е на сила, со што инвеститорите не би имале пречка да ги добијат дозволите.
Градоначалникот на Општина Центар, Саша Богдановиќ, за Телма вели дека добрата вест е што не станува збор за шеесткатници, како што беше планирано претходно, туку параметрите сега се намалени.
„По тоа што беше предадено од страна на инвеститорот, станува збор за многу намалена површина, некаде над 55 отсто намалено од тоа што се предвидува во стариот план. Ако претходно околку 200 илјади метри квадратни беа предвидени како површина за градење, сега е предаден проект односно идејно решение со 88-89 илјади квадрати. Задоволен можам да бидам само во тој дел дека максимално ќе дадеме се од себе за да бидат запазени одредени параметри коишто претходно ги вградувавме во плановите. Сакав да успее целата приказна и до крај да се истера со мораториумот, да се ревидираат плановите, но Уставниот суд е нешто што е највисоко во судската власт“,
вели Богдановиќ.
Општата но и стручната јавност е загрижена, бидејќи наспроти сите реакции, со овој чекор ќе се изгуби и последниот слободен простор во центарот на градот.
„Најтешкото решение како ќе изгледа цел тој простор и како ќе се организира ќе биде околу тоа како ќе се реши сообраќајот на таа парцела, затоа што тоа знаете дека е крстосница од повеќе правци на приоѓање, влегување и излегување. Тоа сообраќајно решение веројатно ќе биде клучот на тоа дали ќе успее целиот проект да биде едно фино решение – како за живеење така и за сите оние другите останати функции коишто се неизбежни во овој централен дел“,
вели за Телма, архитектот Љупчо Атанасовски.