Вонредната состојба во земјава, според втората одлука на шефот на државата, треба да трае до 16 мај
Уставниот суд, на денешната седница, ја отфрли иницијативата за оценување на уставноста на првата одлука на претседателот Стево Пендаровски за прогласување вонредна состојба на територијата на целата држава, која беше донесена на 18 март, а беше во сила до 16 април.
Уставниот суд оцени дека иницијативата е беспредметна затоа што оваа одлука веќе не е во сила.
На 16 април Пендаровски донесе нова одлука за утврдување вонредна состојба во земјава, за која, исто така е покрената иницијатива за оценка на уставноста. Вонредната состојба во земјава, според втората одлука на шефот на државата, треба да трае до 16 мај.
Левица ја поднесе иницијативата за оценка на втората одлука на Пендаровски, со образложение дека претседателот не смее да ја продолжува вонредната состојба подолго од 30 дена, како максимален рок предвиден со Уставот. Дали ќе биде покрената покрената постапка за иницијативата на Левица Уставниот суд ќе одлучува на некоја од наредните седници, на која треба да реферира судијата Осман Кадриу, кој е определен за известител по овој предмет.
Според наши информации, дел од судиите се на став дека Пендаровски во овој случај постапил правилно затоа што донел нова одлука за прогласување вонредна состојба, наместо да ја продолжи претходната, со што ќе ја прекршел уставната норма од максимум 30 дена за вонредна состојба.
Пендаровски, минатата недела, изјави за „360 степени“ дека ќе размисли двапати дали би донел нова одлука за вонредна состојба по 16 мај, доколку епидемијата почне да стивнува. Распуштеното Собрание не се состана досега да ги потврди одлуките на Пендаровски за прогласување вонредна состојба, иако пратеници од мнозинството побараа од спикерот Талат Џафери да свика итна седница за таа цел.