Ние имаме јасна позиција, а тоа е дека уставни измени под вакви околности, под вакви услови ние немаме намера да поддржиме, вели лидерот на ВМРО-ДПМНЕ
Лидерот на ВМРО-ДПМНЕ Христијан Мицкоски не знае на што се темели коментарот на претседателката на Европската комисија Урсула фон дер Лајен дека ќе бидат изгласани уставните измени.
„Ако мислат дека пратеничката група од ВМРО-ДПМНЕ ќе ги поддржи овие уставни измени под овие услови и околности, еве јавно кажувам дека тоа нема да се случи. Ние имаме јасна позиција, а тоа е дека уставни измени под вакви околности, под вакви услови ние немаме намера да поддржиме“,
вели Мицкоски.
На новинарско прашање како го коментира ословувањето од Фон дер Лајен како „северномакедонци“, Мицкоски рече дека жали што упорно се греши нашиот идентитет, а тоа е македонски, македонски народ, македонска нација.
„Ако е тоа ненамерно, тогаш очекував барем тие што се до неа да ѝ кажат дека згрешила и дека треба да ја коригираат. Ако е намерно, тогаш е страшно. Тогаш тезата за асимилација на македонскиот народ се потврдува од највисокото ниво во Европа и очекувам денеска да се коригира Урсула фон дер Лајен и како што напиша на македонски така правилно и да го изговори македонскиот народ“,
додаде Мицкоски.
Претседателката на Европската комисија Урсула фон дер Лајен на вчерашната прес конференција во Скопје истакна дека верува оти сите политичари во Северна Македонија ќе сфатат дека мора да дадат заеднички придонес кон тоа земјата да се движи напред. Таа за противењето на опозицијата да поддржи уставни измени без никаква гаранција од Европската Унија одговори дека на билатералната средба е зборувано за оваа важна тема, за уставните измени.
„Сигурна сум дека луѓето од Северна Македонија ќе постигнат мнозинство и ќе гласаат позитивно за уставните измени. Постигнавте многу, минавте низ многу, бевте навистина успешни во напредувањето и сигурна сум дека тука во земјата ќе најдете убедливи аргументи за сите да сфатат дека сите се одговорни за учествување и за придонес кон тоа земјата да се движи напред. Зборувам за младите луѓе коишто имаат сон. Ги повикувам сите политичари да го остварат овој сон на младите луѓе“,
рече Фон дер Лајен.