Уставните судии на денешната седница одлучија да го одложат гласањето за нацрт-решението за одлучување за помилувањата, откако на 27 ноември одлучија да поведат постапка за оценување на уставноста на член 11а врз основа на кој претседателот на државата може да повлече одлука за аболиција.
Предлогот на почетокот на денешната седница го даде уставниот судија Осман Кадриу поради, како што рече, три причини:
„Прво, затоа што на некои судии им треба време да го разгледаат, како и затоа што Законот за помилување има допирни точки со другите предмети кои се на дневен ред, алудирајќи на тоа што на дневен ред е и иницијативата за Законот за амнестија за 27 април“, рече Кадриу.
Како трета причина, Кадиу ја наведе иницијативата за автентично толкување на членот 11 од Законот за помилување која е во собраниска процедура.
За судијата Јован Јосифовски, спорно е Уставниот суд да одлучува кој треба да биде амнестиран.
„Законот за помилување предизвика многу внимание особено со прашањето дали со конкретната амнестија Судот да одлучува кого ќе помилува. Сметам дека со право се проблематизира тоа прашање. Собранието е единствен орган кој дава амнестија. Се поставува прашањето дали судот за одредени лица да дава амнестија, а за други не. За мене е спорно судот да одлучува кого ќе амнестира“, изјави Јосифовски.
Од вкупно девет уставни судии, „за“ предлогот на Кадриу гласаа осуммина.
Процедурата за автентично толкување во Собранието треба да започне денеска во 14 часот, за кога Законодавно-правната комисија закажа седница.
Таа прво треба да одлучи дали ќе ја прифати иницијативата и, доколку ја прифати, тогаш треба да испрати предлог за автентично толкување кое ќе се најде на гласање на пленарна седница.
Барањето за автентично толкување го поднесоа двајцата пратеници од власта, Сашко Костов и Диме Велковски.
Со барањето за автентично толкување на членот 11 од Законот за помилување, пратениците од владејачкиот СДСМ сакаат да го спречат Уставниот суд во можноста да ги „воскресне“ помилувањата на поранешниот претседател Ѓорге Иванов за повеќе од 50 лица опфатени во случаите на Специјалното јавно обвинителство (СЈО). Очекувањата им се дека законодавниот дом ќе заклучи дека ваквиот член воопшто и не постои.