Не ни требаат вашите кристални лустери и позлатени слики, ни требаат тоалети со врата која се затвора, тавани без мувла и ѕидови со изолација, велат од Универзитетското студентско собрание
Младината на ВМРО-ДПМНЕ, пак, реагираше дека интересен е фактот дека штабот на СДСМ е поранешна зграда на МОН и го повикаа УСС да почнат заедничка иницијатива за трансформација на овој простор во студентски дом
По првостепената пресуда за случајот „Талир 2“ со која е одлучено да се одзеде централниот штаб на ВМРО-ДПМНЕ, Универзитетското студентско собрание (УСС) – УКИМ објави дека бара белата палата да биде пренаменета во студентски дом.
„УСС-УКИМ ќе бара конфискуваниот штаб на ВМРО ДПМНЕ да биде пренаменет во студентски дом! На студентите им припаѓа луксузот во кој политичарите досега незаслужено уживаа! Ова е шансата сите заложби дека на младите е иднината и дека државата се грижи за нас да се докажат како реалност! Ова е шанса да се исправи погрешното трошење на парите. Не ни требаат вашите кристални лустери и позлатени слики, ни требаат тоалети со врата која се затвора, тавани без мувла и ѕидови со изолација! Оваа идеја одамна ја дискутиравме во нашите кругови и чекавме конечно да се донесе судската одлука. Ова е шанса ние да создадеме нешто, ќе бараме и поддршка за реуредување на просторот по наш вкус, по идеја на студентите“,
пишува во соопштението од УСС-УКИМ.
На ваквата најава од УСС, вечерва реагираа од Унијата на млади сили (УМС) на ВМРО-ДПМНЕ кои ги повикаа членовите на студентското собрание заедно да започнат иницијатива за централниот штаб на СДСМ на улицата Бихаќска да биде претворен во студентски дом со оглед дека претходно бил зграда на Министерството за образование и наука (МОН).
„ВМРО ДПМНЕ после следните предвремени парламентарни избори се обврзува дека ќе ги подобри условите во студентските домови, мензите и храната во нив, квалитетот на образованието кое ќе го добиваат студентите и можностите по завршувањето на образованието, ќе се зголемат стипендиите, ќе се стимулираат студентите преку повеќе мерки. Интересен е фактот дека штабот на СДСМ, познатата Бихаќска е поранешна зграда на МОН, па ве повикуваме да почнеме иницијатива за трансформација на овој ’простор‘ во студентски дом. И за крај ВМРО ДПМНЕ не е штабот, ние сме постојано во комуникација со студентите по улиците, по дискотеките, кафулињата, парковите, читалните“,
велат од УМС.
Со пресудата за „Талир 2“ покрај конфискација на имот на ВМРО-ДПМНЕ, поранешниот партиски лидер и експремиер Никола Груевски доби шест години затвор, додека бившиот генерален секретар на партијата Кирил Божиновски беше осуден на условна казна.