Еден од кандидатите, Вујица Живковиќ, реагира дека кога Комисијата не е во целосен состав нема легитимитет
Професорот Драган Ѓошевски од Факултетот за земјоделски науки и храна вчера поднел оставка од Комисијата за избор на ректор на Универзитетот „Св. Кирил и Методиј“, објави Радио МОФ повикувајќи се на информација од кандидатот за ректор Вујица Живковиќ.
Ова е уште една во редот оставки во Комисијата: на претходниот претседател на Комисијата, професорот Пламен Тројачанец, и уште три други члена. Секој од нив доби замена, па во моментов со Комисијата претседава професорката Гордана Лажетиќ од Правниот факултет.
Живковиќ го спори легитимитетот на Комисијата, со објаснување дека кога не е во целосен состав нема законска основа таа да ја продолжи постапката.
Но, и покрај тоа, од вчера, според тврдењето на Живковиќ, Комисијата продолжила со изборната постапка, што според него е непочитување на законите и институциите во државата од страна на УКИМ и е лош пример, за студентите, академската заедница и за граѓаните.
И покрај владината уредба и апелите, изборот за ректор на УКИМ продолжува
Претходно за постапката реагираа и Државниот просветен инспекторат, од каде велат дека на УКИМ забрзано се води постапка за избор на ректор спротивно на Уредбата на Владата за постапување во вонредни услови. По ова, се јави и Државната антикорупциска комисија, која реагираше дека согласно Изборниот законик, не смее да се води постапка за избор во време на парламентарни избори, се до конституирањето на Парламентот и Владата.
Независниот академски синдикат НАкС, пак, вчера соопшти дека ќе поднесе претставки против организаторите на, како што велат, противзаконските избори за ректор на УКИМ.
Кандидатите ги објавија своите програми, а гласањето е закажано на 26 јуни.