Директорот на Центарот за управување со кризи Стојанче Ангелов на својот фејсбук-профил информираше дека Управувачкиот комитет на седница, која се одржала предмалку, го прифатила предлогот на Групата за процена и ѝ предложила на Владата да донесе одлука за постоење кризна состојба на целата територија на државата во траење од 30 дена.
„Групата за процена, составена од директорите на ЦУК, ДЗС, АНБ, БЈБ, Агенција за разузнавање, заменикот на началникот на Генералштабот на Армијата, раководителот на службата за воена безбедност и разузнавање, замениците директори на ЦУК и ДЗС и советникот за национална безбедност од кабинетот на претседателот, попладнево одржа седница на која поради зголемениот обем на пожарите, зголемениот ризик за граѓаните и неколку други причини, донесе едногласна одлука да му предложи на Управувачкиот комитет (министрите за внатрешни и надворешни работи, одбрана, здравство, транспорт и врски, како и раководителот на групата за процена) да ѝ предложи на Владата да донесе одлука за постоење на кризна состојба на територијата на РС Македонија заради зголемена појава на пожари и спречување од нивно ширење во траење од 30 дена“,
информираше Ангелов преку Фејсбук.