Управниот суд ги одби тужбите поднесени од Алијанса за Албанците и Алтернатива, како и тужбата од партијата Интегра и едно физичко лице.
Оттаму информираат дека тужбите се одбиени како неосновани и се потврдуваат решенијата на Државната изборна комисија.
„Заклучно ден 22.07.2020 година, донесени се вкупно 77 одлуки, од кои 75 одлуки по тужби поднесени од тужителот Алијанса за Албанците и Алтернатива, една одлука по тужба поднесена од тужителот Интегра – Македонска конзервативна партија, како и една одлука по тужба поднесена од тужителот Живка Арсовска и по истите се донесени пресуди со кои тужбите на тужителите се одбиваат како неосновани и решенијата на Државната изборна комисија се потврдуваат“,
информира Управниот суд.
Сите 77 одлуки се објавени на официјалната веб-страницата на Управниот суд.
Од Управниот суд додаваат дека во тек е одржување на јавни расправи по поднесени тужби од политичките партии Левица, Социјалдемократска унија, МОРО – Работничка партија и Демократи, чии одлуки ќе бидат јавно соопштени по завршување на расправите.