Од новата парламентарна партија бараат и да се поништи гласањето во оспорените гласачки места
Тужбите за поведување управен спор се поднесени врз основа на погрешно утврдена фактичка состојба и погрешна примена на материјалното право, велат од Левица, од каде што сметаат дека ДИК неосновано им отфрлила дел од приговорите преку однапред подготвен шаблон за одбивање, без навлегување во спецификите на секој поединечен случај.
„Сето ова говори во насока на тезата за аматерското, несериозно и непрофесионално постапување на членовите на ДИК кон проблематиката на предочените изборни нерегуларности! Дотолку повеќе, просечното време на ‘решавање’ на ДИК по секој приговор е дури неверојатни 3 секунди – што е навреда за здравиот разум и за интелигенцијата на секој македонски граѓанин“
се наведува во соопштението од Левица.
Од Левица бараат Управниот суд да ги усвои тужбите и да се поништи гласањето во оспорените гласачки места, бидејќи истите според партијата, влијаат врз вкупниот конечен резултат за распределба на мандатите, според прифатениот пропорционален Донтов модел на изборни количници.