Кандидатки беа актуелната директорка Наташа Габер-Дамјановска и судијката Оља Ристова, но иако беше кажано дека ги исполнуваат условите ниту една од нив не ги доби потребните пет гласа „за“
Управниот одбор (УО) на Академијата за судии и јавни обвинители „Павел Шатев“ денеска на јавна седница не успеа да избере директор по огласот на Академијата.
Кандидатури на огласот поднесоа актуелната директорката Наташа Габер-Дамјановска и судијката од Основниот кривичен суд Оља Ристова. Иако беше кажано дека и двете кандидатки ги исполнуваат условите за функцијата, сепак ниту за едната ниту другата не го добија потребниот број гласови од членовите на УО на Академијата.
За Габер Дамјановска четворица членови гласаа „за“, а пет „воздржани“, додека за Ристова еден „за“ и осум „воздржани“. За избор на директор потребни се минимум пет гласа „за“ од вкупно девет членови.
Претседателот на Управниот одбор на Академијата, судијата Лазар Нанев појасни дека, актуелната директорка Габер-Дамјановска ќе ја извршува функцијата до истекот на нејзиниот мандат односно до крајот на годината и најави дека повторно ќе биде објавен оглас за избор на директор на Академијата.