Внатрешните избори, на кои победи Питер Марки-Заи, конзервативниот градоначалник на мал град во јужниот дел на Унгарија, ги организираа шест опозициски партии, во обид да постигнат подобар успех во мнозинскиот изборен систем што ја фаворизира владејачката партија Фидес
Питер Марки-Заи, конзервативниот градоначалник на мал град во јужниот дел на Унгарија, ќе биде кандидат на здружената опозиција, кој ќе му се спротивстави на премиерот Виктор Орбан на следните парламентарни избори во пролетта 2022 година.
Тој ја победи Клара Добрев, потпретседателка на Европскиот парламент и кандидатка на либералната партија Демократска коалиција, во вториот круг од вчера одржаните прелиминарни избори внатре во опозицијата, со 57 отсто од гласовите.
„Сакаме нова, почиста, чесна Унгарија, а не само да го замениме Орбан или неговата партија“,
им се обрати Марки-Заи на поддржувачите во Будимпешта.
Внатрешните избори беа организирани од шест опозициски партии кои формираа сојуз во 2020 година, во обид да постигнат подобар успех во мнозинскиот изборен систем што ја фаворизира владејачката десничарска партија Фидес.
Целта на опозицијата е да се избере само еден противник на Орбан, како и по еден кандидат за секоја изборна единица кој ќе се спротивстави на Фидес на изборите во април следната година.
Марки-Заи, католик и татко на седум деца, рече дека се избрани чисти кандидати низ целата земја, кои ќе можат да ја ослободат земјата од „најкорумпираниот систем во илјадагодишната историја на Унгарија“.
Анкетите на јавното мислење укажуваат на изедначена трка меѓу опозицискиот сојуз и Фидес, како и дека Марки-Заи има подобри шанси од Добрев да го победи Орбан.