Уметниците кои не се во редовен работен однос и чии проекти се откажани поради пандемијата, за кои добиле поддршка во рамките на Годишната програма 2020 од Министерството за култура, може да аплицираат за државна помош во вредност од 14.500 денари за месеците април и мај.
Јавниот повик е веќе објавен на веб-страницата на Министерството за култура, а се однесува на донесената Уредба со законска на 57 седница на Владата.
Уредбата се однесува на финансиска поддршка на уметници и други физички лица кои самостојно вршат дејности и други активности во областа на културата за време на вонредна состојба.
„Корисник на финансиска поддршка може да биде уметник или друго физичко лице-барател, државјанин на Република Северна Македонија, кој самостојно или преку авторски или друг вид на договор, учествува во реализација на проект поддржан на Годишните конкурси за финансирање на проекти од национален интерес во културата за 2020 година или во реализација на проект поддржан од меѓународни фондови, односно меѓународни организации, а кој е откажан поради здравствено – економската криза предизвикана од коронавирусот ковид-19“,
велат за 360 степени, од Министерството за култура.
Министерството го објави јавниот повик за доставување барање за користење на финансиска поддршка, а барателот во рок од 15 дена, треба да достави барање и изјава за исполнетоста на условите.
„Уредбата за финансиска поддршка на уметници и други физички лица кои самостојно вршат дејности и други активности во областа на културата за време на вонредна состојба ќе се спроведува преку Министерството за култура, а исплатата на средствата ќе се врши од средствата во Фондот за помош и поддршка за справување со кризата предизвикана од коронавирусот ковид-19, формиран во рамките на Генералниот секретаријат на Владата на Република Северна Македонија“,
дополнуваат од Министерството за култура.
Паричната помош за филмските работници ќе се спроведува преку Агенцијата за филм
Владата донесе и Уредба за финансиска помош и за филмските работници за време на вонредна состојба, која ќе се спроведува преку Агенцијата за филм, а може да аплицираат филмски работници кои се државјани на земјава, а во последните пет години работел на минимум три филма поддржани од Агенцијата. Право на аплицирање имаат и филмските работници кои требало да работат на филм поддржан од Агенцијата, но неговата реализација е откажана или одложена поради здравствено-економската криза предизвикана од коронавирусот. Јавниот повик за финансиска поддршка на филмските работници е веќе достапен на веб-страницата на Агенцијата за филм.
„Финансиската поддршка од овие уредби со законска сила, не може да ја оствари барател кој е опфатен со Уредбата за финансиска поддршка на самостојните уметници за време на вонредна состојба, кој е во редовен работен однос или е примател на пензија согласно евиденцијата на Фондот на пензиското и инвалидското осигурување на Република Северна Македонија, кој остварува други приходи по кој било основ или е опфатен со другите економски мерки на Владата на Република Северна Македонија за справување со здравствено-економската криза предизвикана од коронавирусот ковид-19“,
велат од Министерството за култура.
Независната културна сцена бара специјални мерки
Од Иницијативата „Култура е насловна страна на секое општество“ и Асоцијацијата на независната културна сцена – Јадро велат дека повеќето нивни предлози кои се однесуваат на финансиската помош се прифатени од страна на Министерството за култура, но бараат да се содржат и другите предлози.
„Уредбата не ги содржи нашите барања да се вклучат во поддршката и вработени во правно лице кое е регистрирано за вршење на дејност од областа на културата, а тие лица не се опфатени со оваа, а и ниедна друга мерка и уредба. Исто така, критериумите за добивање на средства се уредени според Министерството за култура и не ги содржат сите наши сугестии“,
се вели во соопштението.
Во соопштението меѓу другото потсетуваат дека на почетокот на кризата поднеле барање за воведување на специјални мерки за помош на домашната вонинституционална културна сцена како резултат на кризата со коронавирусот. Барањето било доставено до Оливер Спасовски претседател на Владата, Mила Царовска заменичка на претседателот на Владата задолжена за економски прашања, Хусни Исмаили министер за култура и Петре Шилегов градоначалник на Град Скопје.