Полицаец од блиската патрола со помош на случајни минувачи успеал да го изгасне пожарот на оделото на Украинецот, а брзата помош го пренела во болница каде што лекарите процениле дека е во тешка состојба поради изгореници и дека неговиот животот бил во опасност
Повозрасен Украинец, во знак на протест, денеска се самозапалил пред украинскиот конзулат во Краков, Полска. Тој им викал на своите сонародници во редот пред зградата да се вратат во татковината и да се борат против Русија, јавија полските медиуми.
„Околу осум часот наутро, 63-годишен маж стоел во ред пред украинскиот конзулат во Краков, кога одеднаш почнал да вика нешто на украински. Во еден момент извадил тегла со запалива течност, се полил со неа, ја запалил и почнал да бега“,
изјавил портпаролот на полицијата во Краков, Пјотр Шпиех, за полската телевизија Полсат.
Полицаец од блиската патрола со помош на случајни минувачи успеал да го изгасне пожарот на оделото на Украинецот, а брзата помош го пренела во болница каде што лекарите процениле дека е во тешка состојба поради изгореници и дека неговиот живот бил во опасност, јави полското радио РМФ ФМ.
Според податоците на полската гранична стража, од нападот на Русија врз Украина на 24 февруари 2022 година, 11 милиони украински бегалци ја преминале полската граница, додека 9,35 милиони се вратиле во земјата преку Полска.
Според податоците доставени од Полска до УНХЦР, 1,5 милиони украински воени бегалци, главно жени и деца, добиле привремено засолниште и државна помош во Полска.