Украинскиот претседател Володимир Зеленски предупреди дека руските сили се подготвуваат да го бомбардираат јужниот пристанишен град Одеса и ги повика западните лидери да ѝ помогнат на Украина, истакнувајќи дека тоа е нивна хуманитарна должност
Вториот обид за евакуација на цивили од опколениот јужен град Мариупол и денеска не успеа поради континуираните гранатирања на градот, а двете страни продолжија да се обвинуваат меѓусебно за прекршување на примирјето. Црвениот крст соопшти дека двете страни не се договориле за деталите како би се спровел хуманитарниот коридор.
Според информациите на украинските власти, загинале најмалку три лица, меѓу кои и две деца.
Рускиот претседател Владимир Путин во денешниот двочасовен телефонски разговор со претседателот на Франција Емануел Макрон му рекол дека Русија ќе ги постигне своите цели преку „преговори или војна“, соопшти Елисејската палата.
Претходно, Путин истото му го кажа и на турскиот лидер Реџеп Таип Ердоган.
Повеќе од 1,5 милион луѓе ја напуштиле Украина за само 10 дена, според Агенцијата за бегалци на ОН (УНХЦР), при што мнозинството – скоро милион – се во Полска.
ЕУ проценува дека од Украина може да произлезе бегалски бран од осум милииони луѓе.
Украинскиот претседател Володимир Зеленски предупреди дека руските сили се подготвуваат да го бомбардираат јужниот пристанишен град Одеса.
Тој ги повика западните лидери да ѝ помогнат на Украина, истакнувајќи дека тоа е нивна хуманитарна должност.
Околу 4 631 луѓе биле приведени на антивоените демонстрации во Русија денеска – повеќе од 13 000 од почетокот на војната.
Најмалку 364 цивили се убиени во Украина од почетокот на војната, соопшти канцеларијата на Обединетите нации за човекови права – додавајќи дека реалните бројки веројатно ќе бидат „значително повисоки“.
Речиси 20 000 странски државјани поднеле барање да одат во Украина да се борат, изјавил министерот за надворешни работи на Украина, Дмитро Кулеба, цитиран во локалните медиуми.
Украинската влада вчера отвори вебстраница на која се поднесуваат апликации.