„Се надевам дека формирањето на новото Министерство за евроинтеграција како институционален доказ за цврста посветеност кон европскиот пат ќе го поттикне нашето приближување во ЕУ и ќе станеме стандардна европска држава“, рече претседателката
Соочени сме со насушна потреба од нов Маршалов план. Она што по Втората светска војна го направија САД за разурнатата Европа, сега Европа е во можност да го стори за Украина, земја која, исто како и ние, секогаш била дел од Европа, историски, културно, а сега веројатно ќе стане и политички.
Ова денеска го изјави претседателката Гордана Сиљановска-Давкова по учеството на Конференцијата за обнова на Украина, што се одржува во Берлин, изразувајќи надеж дека, како што рече, македонската и украинската иднина ќе биде во Европската Унија.
„Неподелено беше мислењето дека е потребна емпатија и разборање во моментот. Треба да се подготви обновата на Украина, дури и кога сѐ уште трае војната. Ние и досега покажавме дека сме на линија на европската надворешна и безбедносна политика. Не само што ѝ помагаме на Украина, како членка на НАТО, со издвојување од 2 отсто од бруто-општествениот производ на НАТО, влегуваме во 18-те држави со највисоки издвојувања, туку и како што можеме политички, воено, па и економски ѝ помагаме на Украина“,
рече таа.
Според неа, ние сме една од најсиромашните држави во Европа и не можеме да се натпреваруваме со големите држави во помошта, но, како што додаде, има голем простор и за наше учество во сите останати области.
„Консензус постои дека проблемите на Украина се европски проблеми. Значи и наши проблеми. Наш проблем е Украина. Треба да го сториме она што ни е должност. Се надевам дека не само во оценката во она што се случува во конфликтот, јасна отворена осуда на агресијата кон Украина, туку и во чекорите што следат, помош од различен вид. Имаме искуство по распадот на Југославија и мислам дека тоа искуство можеме да го понудиме како помош“,
вели претседателката Сиљановска-Давкова.
Претседателката рече дека ја тревожи ноторниот факт дека европска заедница настанала како мировен проект во 50-тите години на минатиот век.
„Конференцијата е продолжение на серијата годишни настани на високо ниво посветени на брзо закрепнување и долготрајна реконструкција на Украина, по почетокот на руската воена агресија“,
рече таа.
Очекува Украина да се справува со проблеми како корупција, проблеми кои рече дека секогаш одат со војните, но се радува што Украина веројатно ќе добие почеток на преговори.
Посакува и ние да ставиме крај на, како што рече, оваа сага од 23 години и да ги почнеме преговорите со Европската Унија.
„Се надевам дека формирањето на новото Министерство за евроинтеграција како институционален доказ за цврста посветеност кон европскиот пат ќе го поттикне нашето приближување во ЕУ и ќе станеме стандардна европска држава“,
рече претседателката.
Сиљановска-Давкова, како што соопштија од нејзниот кабинет, се обратила на главниот панел за шефови на држави и влади на кои говореле и домаќините на конференцијата, германскиот канцелар Олаф Шолц и претседателот на Украина, Володимир Зеленски.
Конференцијата е продолжение на серијата годишни настани на високо ниво посветени на брзо закрепнување и долготрајна реконструкција на Украина, по почетокот на руската воена агресија.