Според најавите од УХМР, поројниот дожд ќе доведе до зголемување на водостојот на реките, а кај некои помали реки во земјава можни се и локални излевања, посебно во југоисточните делови и струмичкиот регион
Управата за хидрометеоролошки работи (УХМР) и Центарот за управување со кризи (ЦУК) предупредуваат дека денеска во попладневните и вечерните часови се очекуваат врнежи од дожд, кои на места ќе бидат поројни.
„На места, особено во источните делови врнежите ќе бидат поројни, над 35 литри на квадратен метар, проследени со грмежи, а локално ќе има услови за краткотрајно невреме“,
велат од Управата.
Според најавите од УХМР, поројниот дожд ќе доведе до зголемување на водостојот на реките, а кај некои помали реки во земјава можни се и локални излевања, посебно во југоисточните делови и струмичкиот регион.
Значително високи водостои на реките се очекуваат и во западниот дел на земјата, поконкретно, во сливот на реките Радика, Сатеска, Треска и горниот дел од сливот на Вардар.
„Поради можноста од појава на поројни, интензивни врнежи, придружувани со засилен јужен ветер, можни се локални проблеми кај дел од градските урбани населени места каде би се појавиле ваков тип на врнежи“,
додаваат од УХМР.
Поради најавите за можно невреме проследено со пороен дожд, Центарот за управување со кризи (ЦУК) предупредува на претпазливо движење покрај реките и суводолиците денеска и утре.
По најавите за поројни врнежи од дожд денеска попладне и во текот на ноќта, Јавното претпријатие „Водовод и канализација“објави дека екипите на претпријатието се на терен и работат на проверка и расчистување на сливниците, шахтите и улиците.