По однос на барањето за субвенции на плати, се разгледувала алтернатива за бескаматни кредити, а не се разговарало за враќање на работното време и по 21 часот
Прифатени се три од вкупно пет барања на Независната угостителска комора (НУК) на денешната средба на нејзини претставници со вицепремиерот за економија Фатмир Битиќи.
„Разговаравме речиси два часа. Имаше дискусии и појаснувања околу нашите барања, како и презентација на пакетот мерки што го спрема Владата. Од нашите пет барања, трите се речиси во целост исполнети, четвртото барање останува да се доработи, а во однос на петтото немаше дискусија. Најверојатно месец јануари на некој начин е изгубен во однос на субвенцијата за плати, но државата работи и вложува напори како да ги надомести во наредниот период“,
изјави Здравко Јосифовски од НУК.
По однос на барањето за субвенции на плати, се разгледувала алтернатива за бескаматен кредит, така што оние кои до крајот на годината ќе ги задржат сите вработени ќе добијат ослободување од поголдм дел од обврските. За изедначувањето на ДДВ добиле уверување дека ќе се разговара и на следните средби и декаследната година сигурно ќе се исполни ова ветување. За враќање на работното време и по 21 часот не се разговарало, иако угостителите ги повториле своите барања за унифицирани протоколи за угостителските објекти, изработени во соработка со Министерството за здравство.
Битиќи, на средбата, како што соопштија од неговиот кабинет, посочил дека Владата уште од самиот почеток, имајќи го предвид глобалното влијание на пандемијата, како и ограничувачките мерки за заштита и превенција од ширењето на коронавирусот, ги детектирала угостителството и туризмот како сектори кои имаат негативни последици. Затоа, додаде Битиќи, Владата досега креираше четири сета на мерки, во кои еден од главните фокуси беше ставен токму на поддршката на угостителскиот и туристичкиот сектор, но и на сите други сектори кои бележеа загуби поради пандемијата.
„Владата работи на сетови на мерки што ќе ја придвижат економијата напред. Во претходните сетови мерки, угостителството и туризмот беа сериозно поддржани, затоа што државата со уредба го ограничи нивното работење. Во моментов факт е дека угостителите имаат можност да работат, секако следејќи ги протоколите, а голем дел од угостителите имаа можност и да ја прилагодат својата работа со воведување достава на производите до своите клиенти“,
вели Битиќи, нагласувајќи дека петтиот пакет мерки е во насока на заздравување и рестарт на економијата.
–
