Двајца новинари и камерман на руската телевизија Дожд денеска се уапсени во Минск, каде се одржуваат изборите за претседател на Белорусија. Уапсени се новинарите Владимир Роменски и Василиј Полонски, како и камерманот Николај Антипов, јави агенцијата ТАСС.
„Луѓе во цивилна облека со маски на лицето ги принудиле да легнат на земја, а потоа ги однеле во непознат правец“,
се наведува во соопштението.
Според претставници на штабот на нерегистрираниот кандидат Виктор Бабарика, сојузник на кандидатката Светлана Тихановскаја, новинарите биле уапсени откако разговарале со неа на улица. Телевизијата Дожд посочува дека уште во јуни испратила акредитации за своите новинари и дека тие работеле во Минск, чекајќи потврда од белоруските власти.
Во текот на денешниот ден од јавноста исчезна и главната кандидатка на опозицијата Светлана Тихановскаја, која е и најсериозниот опонент на досегашниот претседател Александар Лукашенко. Таа ноќеска го напуштила својот стан и замина на непозната локација.
Портпаролите на нејзината кампања соопштија дека побегнала од станот од безбедносни причини, откако полицијата приведе неколку нејзини соработници.
Во текот на ноќта, полицијата на кратко ја приведе шефицата на кампањата Марија Колесникова и ја однесе во полициска станица на испитување. Ден порано, приведена беше и друга членка на тимот на кампањата Марија Мороз.
Како што јави Си-ен-ен, Тихановскаја претходно изјавила дека мора своите деца да ги прати во странство затоа што добивала закани дека тие ќе останат сираци.