Двајцата мажи, како што информираат од грчката полиција, биле уапсени откако при влез во Грција им била извршена проверка
Грчката полиција на граничниот премин во близина на Дојран кај двајца државјани на Северна Македонија пронашла 599 фалсификувани бланко документи. Лицата биле уапсени, а потоа и осудени на затворска казна, пренесува МИА.
Двајцата мажи, како што информираат од грчката полиција, биле уапсени откако при влез во Грција им била извршена проверка. При проверката, кај едното од лицата, во поставата на јакната, биле пронајдени скриени 440 бланко документи како лични карти, возачки дозволи и дозволи за престој од разни европски земји.
По пронаоѓањето на документите, тие биле одземени.
Потоа, при претресот на возилото, во багажникот биле пронајдени уште 159 празни документи кои исто така биле одземени.
Двајцата уапсени, како што пренесува МИА повикувајќи се на грчката новинска агенција АНА-МПА, Прекршочниот суд во Кукуш ги прогласил за виновни за фалсификување и здружување со цел економска корист и биле осудени на затворска казна од пет години.
Според пишувањата на АНА-МПА, двајцата обвинети за време на рочиштето не откриле детали за нивните активности и се бранеле со молчење.