Оттаму велат дека во наредниот период особено внимание ќе биде посветено на доследната примена на законските решенија и исполнувањето на препораките на Европската комисија
Извештајот на Европската комисија за 2026 година нотира позитивни достигнувања во правосудството и го препознава напредокот во унапредувањето на законската и институционалната рамка во согласност со европските стандарди, соопштуваат од Министерството за правда.
Според нив, меѓу позначајните достигнувања се напредокот во спроведувањето на Стратегијата за реформа на правосудството 2024-2028, донесувањето на новиот закон за Судскиот совет, кој во голема мера ги адресира препораките на Венецијанската комисија, како и донесувањето на новиот закон за Советот на јавните обвинители.
„Во Извештајот се нотираат и донесувањето на законите за платите на судиите и јавните обвинители, новиот закон за парничната постапка, напредокот во подготовката на Патоказот за владеење на правото, како и општата усогласеност на законската рамка за основните права со европските стандарди“,
се додава во соопштението од Правда.
За Министерството за правда, како што наведуваат, овие оценки претставуваат потврда за постигнатите резултати, но и дополнителна обврска за продолжување на реформите.
Оттаму велат дека во наредниот период особено внимание ќе биде посветено на доследната примена на законските решенија и исполнувањето на препораките на Европската комисија.
Од Министерството нагласуваат дека вистинскиот успех на реформите не се мери само преку донесените закони, туку и преку нивното влијание врз функционирањето на институциите и остварувањето на правата на граѓаните.
„Целта останува изградба на независен, професионален, транспарентен и ефикасен правосуден систем, во кој законот важи подеднакво за сите, а довербата на граѓаните се гради преку конкретни резултати“,
велат од Правда.