Во меѓувреме, сè уште останува непознато кој е убиецот на 29-годишниот навивач на АЕК кој смртно настрада во тепачката помеѓу навивачите на Динамо Загреб и АЕК во центарот на Атина
Грчките медиуми јавуваат дека денеска е уапсен Грк кој наводно ги одвел навивачите на Динамо Загреб до местото каде што се случија инцидентите со навивачите на АЕК, во кои животот го загуби 29-годишен навивач на грчкиот тим. Во меѓувреме, полицијата трага по уште 10 хрватски навивачи, а за властите е сè уште непознат идентитетот на убиецот на младиот Грк. Поради тоа истрагата е проширена и е распишана нова потерница за уште еден Грк и за уште пет Хрвати.
Досега грчката полиција успеа да уапси и притвори 105 хулигани, а истрагата сега се сведува на ДНК-анализа со примероци од уапсените, но и со камери кои го имаат снимено убиството на младиот навивач.
Според информациите, грчкиот навивач кој ги одвел хулиганите на местото на злосторството е навивач на ривалскиот тим на АЕК, Панатенаикос, а двете навивачки групи – на Панатенаикос и Динамо Загреб се збратимени и во одлични односи.
Полицијата продолжува со проверките од одземените мобилни телефони на уапсените лица, а се вели и дека повторно ги чешлаат безбедносните снимки од местото на тепачката, а Грците чекаат од своите хрватски колеги податоци за приведените.
Вчера, хрватскиот премиер Андреј Пленковиќ кажа дека дивеењето и хулиганството на група навивачи на Динамо Загреб минатата недела во Атина и хаосот во кој беше убиен навивач на грчки АЕК претставува негација за спортот и го нарушува угледот на Хрватска, и затоа секој ваков потег мора да биде осуден. Но, рече и дека не е можно сите 100 осомничени да бидат подеднакво одговорни за немирите и затоа ги повика грчките власти да ги депортираат невините навивачи што е можно поскоро.
„Без да ја прејудицирам вината, изразив сочувство за смртта на навивачот на АЕК. Побарав од премиерот да ја осигура безбедноста на нашите граѓани во затворските институции. Второ, процесот да биде фер, брз и ефикасен. Со оглед на тоа што не е реално сите 100 осомничени да се подеднакво одговорни за немири, предизвикување повреди и уништување, оние за кои ќе се утврди дека не се, што поскоро да бидат депортирани во Хрватска“,
рече Пленковиќ.