Министерот за внатрешни работи на Турција, Сулејман Сојлу, поднесе оставка поради полицискиот час, но претседателот Реџеп Таип Ердоган не ја прифати.
Сојлу на Твитер соопшти дека се повлекува од функцијата откако беше изложен на критики поради воведениот полициски час за време на викендот во поголемите градови во земјата, како одговор во борбата со ширењето на пандемијата на коронавирусот.
„Претседателот не ја прифати оставката на нашиот министер за внатрешни работи, тој ќе продолжи да ја извршува својата должност“,
соопштија од турското претседателство, а пренесоа тамошните медиуми.
Турција во петокот вечерта соопшти дека во сила стапува дводневен полициски час во текот на викендот, а во пресрет на неговиот почеток голем број луѓе ги преплавија продавниците во Истанбул и во останатите градови за да се снабдат со храна и пијалаци.
Одлуката да се воведе полициски час ја критикуваа голем број граѓани ширум земјата, од кои многумина укажаа на тоа дека со таквиот потег се зголемува ризикот од ширење на вирусот.