Претседателката на Судскиот совет Павлина Црвенковска реагира по информациите дека на последната седница се случил бунт од страна на седум членови избрани од судиите кои спречиле да помине готов список за гласање за клучни места во Академијата за судии и обвинители
На седница дојдов со листа со имиња на предлози за одредени позиции во Академијата за судии и јавни обвинители, а не со некаков список како што тоа сакаат да го прикажат некои членови на Судскиот совет, реагира претседателката на Судскиот совет Павлина Црвенковска по информациите дека на последната седница се случил бунт од страна на седум членови избрани од судиите кои спречиле да помине готов список за гласање за клучни места во Академијата за судии и обвинители.
„Неопходно беше да имам листа со имиња затоа што јас на седницата изнесов 15 предлог кандидати, согласно моето право како претседателка и тешко дека човек може да запамти 15 имиња освен ако не ги запише како потсетник. Укажувам дека и други членови на Судскиот совет имаа свои предлози за позициите во Академијата за судии и јавни обвинители. Еден од нив предложи шест имиња, кои исто така ги прочита од список. Друг член, пак, предложи неколку други кандидати кои ги прочита од својата листа, но тенденциозно само мојата листа се оцрнува како некаков список. Многу важно за јавноста е да знае дека моите предлози ниту беа, ниту може да се последни и само по нив да се изјаснат членовите на Судскиот совет, туку секој член на советот има право да предложи имиња, што впрочем и се случи“,
вели Црвенковска во изјава за „360 степени“.
Таа демантира дека веднаш по изнесувањето на нејзините предлози инсистирала да се гласа, напротив, вели тврдам дека повикала на дискусија.
„Нагласувам еден факт, ако јас не сум дозволила дебата, тогаш како непосредно по мојот повик за дискусија членови на Судскиот совет изнесоа свое мислење и предлагаа свои имиња за позиции во Академијата? Ако јас не дозволував дебата, односно таа ми била изнудена, како што се манипулира во јавноста, тогаш предлозите и ставовите на другите членови немаше да следуваат веднаш по завршување на моето излагање. Токму отворената дебата и оставената можност секој член да предложи кандидат иницираа седницата да биде прекината и да се одложи за следната недела. Имено, за предлозите на некои членови немавме податок дали нивната актуелна функција во судстото има конфликт на интереси со функцијата за која се предлага во Академијата“,
посочува Црвенковска и додава дека прифаќа критика, но не и недолично манипулирање од страна на некои членови на Советот.
Членови на Судскиот соовет избрани од судиите дигнале бунт на седницата во четврток кога претседателката на Судскиот совет Павлина Црвенковска влегла со список на кандидати за членови на управниот одбор и на комисиите за приемен и за завршен испит на Академијата за судии и јавни обвинители „Павел Шатев“. Само што почнала седницата, Црвенковска набрзина ги прочитала кандидатите и веднаш ги ставила на гласање, без никаква дебата за нив. Ова го спречиле седуммина членови на Советот избрани од судиите. Не само што се избориле да се дебатира за судиите од списокот – кандидати за одлучувачки и битни места во Академијата, туку и најголемиот број не ги гласале.