ЛДП во парламентот ќе дејствува независно како и досега, а ќе даде поддршка на сè што значи напредок на државата на реформскиот и евроинтегративниот пат и ќе носи просперитет на граѓаните
Либерално-демократската партија синоќа ја одржа првата седница на Централниот одбор по двојните претседателски и парламентарни избори на која донесе одлука да ѝ даде целосна поддршка на претседателката Моника Зајкова и раководството да ја води и застапува партијата во идните дејствувања и во јавноста, информираат од ЛДП.
„Како одговорна партија, ЛДП внимателно го разгледа извештајот за подготовките, настапот и резултатите на партијата за претседателските и за парламентарните избори 2024 година доставен од страна на Централниот изборен штаб. Централниот одбор го усвои извештајот, а беа детектирани и беше укажано на слабостите кои се појавија во текот на кампањата“,
се наведува во партиското соопштение.
ЛДП, се додава, во парламентот ќе дејствува независно како и досега, а ќе даде поддршка на сè што значи напредок на државата на реформскиот и евроинтегративниот пат и ќе носи просперитет за граѓаните.
„Исто така, ќе бидеме и гласни критичари на сите закони и политики кои се лоши за државата и ја враќаат назад“,
потенцираат од ЛДП.
На седницата ЦО го овластил генералниот секретар да организира посета на членовите во секоја општинска организација со цел изготвување на темелна анализа за натамошното дејствување и политики на партијата.
Претседателката на ЛДП пред почетокот на седницата на ЦО на партијата, ги отфрли информациите дека ќе премине кон мнозинството во Собранието.
„Денеска ќе носиме одлука за тоа каде членовите ја гледаат партијата во иднина. Ова е либерална и демократска партија во која не одлучува само раководството, туку се слуша и гласот на членството, односно како тие сметаат дека ЛДП треба дејствува. Дотогаш ЛДП ќе дејствува независно и ќе дава поддршка на се она што значи реформаторски и добри закони кои овозможуваат напредок на општеството. Но, ќе бидеме и критичар на она што значи недобра политика за државата или за граѓаните“,
рече таа.
За потсетување, Зајкова беше коносител на ИЕ 1 заедно со Димитар Ковачевски, па на сметка на тоа, заработи и пратеничко место во Собранието.
Според распоредот на силите, во новиот состав на Законодавниот дом најмногу пратеници, односно 58 ќе има коалицијата „Твоја Македонија“ предводена од ВМРО-ДПМНЕ, „Коалицијата за европска Македонија“ на СДСМ ќе брои 18 пратеници, коалицијата „Европски фронт“ предводена од ДУИ ќе има исто 18 пратеници, коалицијата „Вреди“ ќе има 14, а Левица и „Движењето ЗНАМ – За наша Македонија“ ќе имаат по шест пратеника.