Лекарите што работат за „Лекари без граници“ велат дека израелските сили ја нападнале болницата „Насер“ кон крајот на јануари, пред да се повлечат еден месец подоцна, оставајќи ја установата неспособна да функционира
Властите во Газа ја завршија проверката на масовните гробници во болница во јужниот дел на Појасот и објавија дека откопале 392 тела. Претставник на палестинската цивилна одбрана во Газа вчера изјави дека 165 тела биле идентификувани и закопани во комплексот на болницата „Насер“ во Кан Јунис по повлекувањето на израелските сили.
Израелските одбранбени сили (ИДФ) негираат дека нивните војници ставале тела во масовни гробници и тврдат дека гробниците во комплексот „Насер“ биле ископани од Палестинци во Газа пред неколку месеци.
„Идентитетот на преостанатите 227 тела допрва треба да се утврди. Најдовме три масовни гробници, првата пред мртовечницата, втората зад мртовечницата и третата северно од зградата за дијализа“,
рече Мохамед ал Мигајер.
Цивилната одбрана на Газа признава дека околу 100 луѓе биле закопани во болничката област. Новинар на Си-ен-ен, кој во неделата ја посетил областа, наведува дека во јануари, како дел од привремена мерка, мештаните ги закопале телата на убиените членови на семејствата на територијата на болницата бидејќи немало безбеден пристап до гробиштата.
Кога се вратиле по израелското повлекување, откриле дека телата биле ексхумирани, веројатно за ИДФ да може да користи ДНК-анализа за да утврди дали меѓу нив има заложници. Телата потоа биле ставени во најмалку една масовна гробница. Новинар на Си-ен-ен видел неколку распаднати тела во болнички наметки. Фотографиите прегледани од Си-ен-ен покажуваат дека телата сè уште носат болнички нараквици.
„Најдовме тела на деца“
Ал Мигајер наведува дека цивилната одбрана пронашла тела на деца во масовните гробници, што докажува дека се работи за геноцид. Палестинските власти веруваат дека најмалку 20 цивили биле живи закопани, но не соопштуваат детали. Ал Мигајер тврди дека некои болнички пациенти биле и егзекутирани и дека на нивните тела биле пронајдени прострелни рани во главата.
Си-ен-ен сними татко додека го идентификува распаднатото тело на својот 15-годишен син. Човекот погледнал во безживотното тело на детето и рекол:
„Тоа е мојот син, по кошулата можам да кажам“.
На видеото се гледа како тој клекнува и го држи својот син за главата.
Коментар на ИДФ
ИДФ на социјалната мрежа Икс сподели објава на меѓународниот портпарол Надав Шошани, кој коментираше видео на кое се гледа како Палестинците ископуваат масовна гробница.
„Циркулираат дезинформации во врска со масовната гробница во болницата ‘Насер’. Гробниците беа ископани во Газа пред неколку месеци. Тоа го потврдуваат и нивните објавени снимки на социјалните мрежи во тоа време. Секој обид да се обвини Израел за закопување цивили во масовни гробници е лага. Тоа е пример за кампања за дезинформации чија цел е делегитимирање на Израел“,
напиша Шошани.
ИДФ соопшти дека извадила десетици тела од Газа за ДНК-тестови во Израел, а потоа ги ставила останките во контејнери.
„Некои беа врзани“
„Чувствуваме потреба да алармираме бидејќи се откриени повеќе тела“,
рече Равина Шамдасани, портпаролка на Високиот комесаријат за човекови права на ОН.
Таа ги опиша телата како „закопани длабоко во земјата и покриени со ѓубре“ и додаде „меѓу загинатите наводно има постари лица, жени и повредени“, вклучително и некои кои биле врзани и без облека.
Лекарите што работат за „Лекари без граници“ велат дека израелските сили ја нападнале болницата „Насер“ кон крајот на јануари, пред да се повлечат еден месец подоцна, оставајќи ја установата неспособна да функционира.