Обид за семејно гласање, групирање, присуство на неовластено лице на гласачко место и случај кога членовите на избирачкиот одбор не ги почитувале мерките за заштита од коронавирус се неколкуте регистрирани нерегуларности на самото отворање на гласачките места што ги забележале набљудувачите на граѓанската организација ЦИВИЛ.
Џабир Дерала на прес-конференцијата нешто по 8 часот ги објави местата каде што се забележани, како што рече, помали нерегуларности, со големо присуство на гласачките места каде што се распоредени нивните 315 набљудувачи.
На ИМ 836 во Кочани ќе забележано групирање на гласачи без почитување на мерките за заштита, додека во ИМ 2873 во Општина Чаир членовите на избирачкиот одбор не ги почитувале овие мерки.
Во Кочани е регистриран и обид за семејно гласање, кој, како што велат од ЦИВИЛ, бил спречен од избирачкиот одбор.
На ИМ 2042 во Брвеница имало неовластено присуство на лице кое се претставило дека е набљудувач на политичка партија, но немал овластување за тоа. Притоа, како што соопшти Дерала, настанала мала тензија, но проблемот е што двајца од членовите на избирачкиот одбор му даваат поддршка на ова лице.
Набљудувачите на ЦИВИЛ утрово биле на 200 избирачки места и сите биле отворени навреме, уредно и прописно.
Во врска со изминатата ноќ, Дерала рече дека се забележани голем број случаи на кршење на изборниот молк и на терен и на социјалните мрежи од како како што рече познати и непознати сторители, иако според материјалите се препознаваат.
Дерала во името на ЦИВИЛ упати апел до гласачите, изборната администрација, медиумите, полицијата и набљудувачите строго да се придржуваат до мерките за заштита од коронавирусот.