Лидерот на СИРИЗА, Алкесис Ципрас му честитал на лидерот на СДСМ Зоран Заев за членството во НАТО и одлуката за почеток на преговорите со Европската унија.
Како што пренесе МИА цитирајќи грчката новинска агенција АНА-МПА, двајцата поранешни премиери имале телефонски разговор.
„Господинот Ципрас му честиташе на господинот Заев и според истите извори истакна дека никој немаше да им верува на нив, на Никос Коѕијас или на Никола Димитров, ако пред три години кажеа дека ќе се случи сето ова. „Дека во една ЕУ што се наоѓа во длабока криза, каде што преовладуваат национализмот и националната изолација пораката за стабилност, меѓусебно почитување и надеж, ќе дојдеше од Балканот, особено од прогресивните сили од двете земји“,
објави грчката новинска агенција.
Според истите информации двајцата поранешни премиери истакнале дека овие работи во регионот се сè уште поважни, особено во време кога сите треба да се мобилизираат во справувањето со пандемијата.
Поранешниот македонски премиер Зоран Заев, според АНА-МПА, ја потенцирал важноста на чекорите преземени од нашата земја за билатералните односи, за регионот и за Европа и додал дека прогресивните сили од двете земји дале пример за Европа, особено во тешките моменти.