Центарот за развој на Полошкиот плански регион, поддржан од сите девет општини во Полошкиот Регион и од Министерството за живoтна средина и просторно планирање, соопшти дека е во тек проектот за интегрирано управување со отпад, преку што треба да се подобри управувањто со цврстиот отпад во полошкиот регион, како и состојбата со нестандардната депонија Русино.
Жителите на Гостивар подолг период, но од јули годинава интензивно со протести, дефилеа и блокади реагираат на проблемот со отпадот во оваа депонија, која уште ја нарекуваат тивкиот убиец на гостиварци, поради неконтролираното депонирање на смет.
Еко-активистите бараат и дислокација на регионалната депонија, со што, како што велат, ќе се стави крај на труењето на гостиварци и несосвесното работење на комуналните претпријатија и надлежните државни власти.
Овој проект ќе биде во две фази. Во тек е првата фаза, која опфаќа изработка на регионален план за управување со отпад и формирање на регионално претпријатие за управување со отпад, кое понатаму ќе ги преземе активностите за управување со отпад. Предвидени се и брзи мерки, чија реализација ќе придонесе кон подобрување на состојбите во Русино.
„Со брзите мерки е предвидено изградба на систем за управување со исцедок со кој преку мрежа на насипи и ровови ќе се оневозможи доток на поројни води во депонираниот отпад, потоа ќе се оневозможи истекување на исцедокот надвор од локацијата, преку негово собирање и рециркулација назад во телото на отпадот, со што значително ќе се намали негативното влијание врз околината. Покрај ова, во рамките на брзите мерки се предвидува и инсталирање на вага со која точно ќе се утврдуваат количините на отпад што пристигнуваат на локацијата“, велат од Центарот, додавајќи дека тендерот за избор на изведувач е веќе распишан и согласно предвидените рокови се очекува постапката да заврши набрзо, а реализацијата на предвидените мерки да заврши до крајот на 2020 година.
За да се намали нивото на прашина што се создава при транспорт на отпадот до Русино, Центарот за развој на полошкиот регион со поддршка на Министерството за локална самоуправа и Бирото за рамномерен развој работи на реконструкција на пристапниот пат до Русино во должина од 2,5 километри и поставување на ограда по должината на патот за да се спречи нелегално фрлање на отпад покрај патот. Во следниот период ќе почне и реконструкцијата на преостанатиот дел од пристапниот пат во должина од 2,5 километри, а се разгледуваат и алтернативни решенија за втор пристап преку регионалниот пат Маврово – Гостивар.
Формирано е и меѓуопштинско регионално претпријатие за управување со отпад кое се очекува да почне со работа наскоро и кое ќе биде финансирано од сите општини во Полошкиот Регион и јавните и приватни компании за собирање на отпад преку наплата за депонирање на отпад. Депонирањето на отпадот ќе се наплаќа по тон, а за таа цел ќе се инсталира вага на влезот на депонијата Русино.
Во соработка со проектанти од Германија кои се дел од проектниот тим, во тек е подготовка на проектна документација за изградба на санитарна депонија за цврст неопасен отпад на локација Русино, а започната е и постапка за оценка на влијанието врз животната средина, која треба да утврди какво е потенцијалното влијание од овој проект и обезбедување на неопходните мерки за заштита.
Од Центарот за развој на полошкиот регион велат дека во целиот овој проект се во контакт и со невладини организации и членови на граѓанската иницијатива „Стоп Русино“.