Според организацијата на ОН за храна и земјоделство, цените на потрошувачката кошница за основни производи во јуни паднаа за 8,6 отсто, но сепак во споредба со 2021 година има зголемување од 13,1 отсто на годишно ниво
Светските цени на прехранбените производи значително паднаа во јули годинава, под влијание на падот на цените на житарките и маслото за јадење, објави денеска организацијата на ОН за храна и земјоделство (ФАО).
Откако го достигна највисокото ниво во март по почетокот на руската инвазија на Украина, индикаторот за цените на храната на ФАО, кој ги следи промените на меѓународните цени на потрошувачката кошница за основни производи, падна за 8,6 отсто во јули во однос на претходниот месец, што претставува пад на цените четврти месец по ред.
Сепак, цените сè уште се на високо ниво и во јули беа за 140,9 отсто повисоки на индексот на ФАО, што е зголемување од 13,1 отсто на годишна основа во однос на јуни 2021 година, наведува агенцијата.
Главниот економист на ФАО, Максимо Тореро Кулен, го поздрави падот, особено во однос на пристапот до прехранбени производи. Сепак, тој предупреди дека многубројните ризици продолжуваат да ја загрозуваат светската безбедност на храната, како што се рецесијата или зголемените цени на житарките и нивното потенцијално влијание врз производството и егзистенцијата на земјоделците, пренесува Франс прес.
Индикаторот на ФАО за масло за јадење падна за 19,2 отсто во јули, на најниско ниво во последните 10 месеци, под влијание на падот на цените на сите масла и цените на суровата нафта.
Големото количество на расположливо палмово масло за извоз во Индонезија и добрата жетва на маслодајна репка придонесоа за пад на цените, заедно со намалената побарувачка за извоз на сончогледово масло, чиј главен производител е Украина, чија цена е забележана забележлив пад.
Показателот на ФАО за житни култури падна за 11,5 отсто, како реакција на постигнатиот договор меѓу Украина и Русија за деблокирање на главните пристаништа во Црното Море.
Од потпишувањето на тој договор на 22 јули, првиот брод „Разони“ ја напушти Одеса во понеделникот по пет месеци целосна блокада во украинските пристаништа. Уште три брода со жито ја напуштија Украина денеска, објавија турските власти кои го надгледуваат извозот.
Индикаторот на ФАО, исто така, покажа дека цените на шеќерот паднале за 3,8 отсто, врз основа на падот на цените на етанолот, што доведе до производство на повеќе шеќер во Бразил во јули од предвиденото. Изгледите за поволно производство во Индија, исто така, придонесоа за овој пад на цените на шеќерот и обезбедија противтежа на стравувањата за европското производство на шеќерна репка.