Секако дека се потребни измени во концептот за матура, но оваа година е законски утврдено како се полага таа и од тоа нема бегање, порача денеска министерката за образование и наука Мила Царовска коментирајќи го бојкотот на наставата на дел од средношколците кои бараат намалување на бројот на предметите од четири на два предмета.
Царовска рече дека е различна сликата за бојкотот на наставата од матурантите. Посочи дека една гимназија во Скопје има поорганизирано дејствување, а сите други, како што вели, се изолирани групи во дел од гимназиите.
„Во Медицинското, на пример, нема ниту еден ученик што бојкотира. Тоа се мали групи кои искажуваат незадоволство и тоа е нивно легитимно право“,
порача Царовска.
Царовска рече дека во интерес на учениците и на квалитетното образование во земјава е да се спроведе државната матура според актуелниот концепт. Вели дека треба да се менува, но дека тоа ќе биде за наредната генерација матуранти кои ќе ја полагаат во 2022 година.
За таа цел, посочи Царовска, на состанок вчера со претставници на Сојузот на средношколци договориле да се формира работна група која од понеделник, заедно со Матурскиот одбор и со Државниот испитен центар, кои се задолжени за државната матура, ќе работат да се подготви нов концепт за наредната учебна година.
„Концептот е утврден на почетокот на учебната година и тој се спроведува во моментот. Секое поместување ќе им направи проблем на учениците за запишување во високото образование надвор или во земјава. Токму затоа утврдивме дека сега одиме со овој концепт. Повеќе од 14 илјади ученици имаат пријавено да полагаат – и проектна задача и да ги полагаат предметите“,
истакна Царовска.
За да се осовремени завршниот испит, и за оваа година, рече, направиле некои промени – во проектната задача и во проширување на листата на изборни предмети за третиот екстерен испит со Географија и Информатика.
Додаде дека со Сојузот на средношколци се во постојана комуникација и координација и, како што рече, тие се репрезентативни во претставување на средношколците, а „Средношколски глас“, рече, е неодамна формиран.
Средношколскиот сојуз од денеска ги организира матурантите на бојкот на наставата и бара намалување на бројот на предметите од четири (три екстерни и еден интерен) на два предмета, односно мајчин јазик (македонски, албански или турски јазик) и втор предмет од областа што ќе ја студира. „Средношколски глас“, пак, е воопшто да не се полага матура и за нејзино укинување собира онлајн-потписи.