Ниту се размислувало ниту се размислува за укинување на групата македонски јазик на Филолошкиот факултет, тоа е пострашно политизирање дури и од укинувањето на предметот историја, порача денеска министерката за образование и наука Мила Царовска.
Таа по денешниот состанок со претставниците на Управниот одбор на ЗЕЛС во одговор на прашање за реакција на професорката Јасна Котеска во врска со македонскиот јазик, посочи оти не сака да ја коментира професорката и потенцира дека реформа во образовниот процес не е никако поврзана со ниту едно надворешно политичко прашање што го има државата.
Не пишав дека се планира укинување на македонскиот јазик, туку се планираЛО (а без да имаме писмен допис) реорганизирање на Факултетот на 1) лингвистички и 2) литературен дел (кадешто македонскиот јазик оди во лингвистички, а мак. лит. во литературен дел) https://t.co/RdAs5KxmME
— Jasna Koteska (@JasnaKoteska) January 14, 2021
„Реформите ни се потребни за дома. Реформите ни се потребни за да создадеме граѓани кои ќе знаат да се справуваат со сите предизвици и кои ќе можат да фатат чекор со светот“,
рече Царовска.
Таа апелира граѓаните да се информираат од формалните канали на Министерството за образование.
„Апелирам до сите да ги следат формалните канали на Министерството, но и моите социјални мрежи, каде што секогаш известуваме вистинито и навремено. Тоа го правиме во овој момент. Вчера имавме јасен демант дека такво нешто ниту се планирало ниту се планира и ги молам и медиумите и граѓаните да не подлегнуваат под вакви провокации и невистини“,
појасни Царовска, која вчера и преку статус на социјалната мрежа Твитер ги демантираше тврдењата на професорката Котеска, која објави дека со новата стратегија за образование се планирало реорганизација на Филолошкиот факултет при УКИМ.