Меѓу земјите кои први се погодени со „општата“ царинска давачка од 10 отсто се Австралија, Велика Британија, Колумбија, Аргентина, Египет и Саудиска Арабија
Американските царински службеници од денеска почнаа да ја наплаќаат едностраната царинска давачка од 10 проценти на увезените производи од повеќе земји, што ја наметна администрацијата на претседателот Доналд Трамп, додека повисоките давачки за стоките од 57 главни трговски партнери на САД треба да стапат во сила следната недела, објавија светските медиуми.
Првичните „основни“ тарифи од 10 проценти стапија во сила на американските пристаништа, аеродроми и царински складишта во 12:01 часот по стандардно источноамериканско време (5:01 според средноевропско време), што, како што наведува „Гардијан“, го означи почетокот на целосна промена од страна на Трамп на системот на меѓусебни тарифи воспоставен по Втората светска војна.
„Ова е најголемата поединечна трговска акција во нашиот живот“,
го пренесува британскиот весник коментарот на трговската адвокатка Кели Ен Шо од адвокатската фирма „Хоган Ловелс“ и поранешна советничка за трговија во Белата куќа за време на првиот мандат на Трамп.
Говорејќи на форумот на тинк-тенкот Брукингс во четвртокот таа рече оти очекува царините да се променат со текот на времето, додека земјите погодени од новите давачки ќе се обидат да преговараат за пониски стапки.
„Но, ова е прилично сеизмичка и значајна промена во начинот на кој тргуваме со секоја земја во светот“,
додаде таа.
Објавата на новите царини од страна на Трамп во средата ги потресе глобалните берзи до корен, бришејќи пет трилиони долари од берзанската вредност на компаниите кои котираат на берзата S&P 500 до нејзиното затворање вчера, што е рекорден пад за два дена. Цените на нафтата и суровините исто така бележат пад, додека инвеститорите се насочуваат кон побезбедни финансиски производи како државните обврзници.
Меѓу земјите кои први се погодени со „општата“ царинска давачка од 10 отсто се Австралија, Велика Британија, Колумбија, Аргентина, Египет и Саудиска Арабија. Билтенот за царина и гранична заштита на САД упати укажување до испраќачите на стоки дека нема да има грејс период за товарите испатени по воден пат на полноќ во саботата.
Сепак, билтенот од агенцијата, според „Гардијан“, вели дека е обезбеден 51-дневен грејс период за товари натоварени на бродови или авиони и кои во транзит до САД пред 12.01 часот според стандардно источномериканско време. Овие товари треба да пристигнат до 12.01 часот на 27 мај за да избегнат царина од 10 проценти.
Во истиот час в среда, треба да стапат во сила повисоките „реципрочни“ царини на Трамп од 11 до 50 проценти на увозот во земјата. Увозот на Европската Унија ќе биде погоден со царина од 20 проценти, додека кинеските стоки ќе бидат царинети со 34 отсто, со што вкупните нови давачки на Трамп за Кина ќе достигнат 54 отсто.
Виетнам, кој имаше корист од префрлањето на американските синџири на снабдување подалеку од Кина по првата трговска војна на Трамп со Пекинг, ќе биде погоден со царина од 46 отсто.
Канада и Мексико беа ослободени од двете најнови давачки на Трамп бидејќи сè уште подлежат на царина од 25 отсто поврзана со американската криза со фентанил.
Од новите царини на САД не е исклулчена ниту земјава. Американскиот претседател Трамп на Македонија ѝ воведе царински давачки од 33 проценти, што е половина од 65 проценти македонски царини за американски производи увезени во државата, што ги пресметала администрацијата во САД.