ДКСК покренува иницијатива за кривично гонење на ексградоначалниците, кои, според наводите, го толерирале сопругот на раководителката на Одделението за урбанизам, кој закупил простор во сопственост на Општината, а не плаќал закупнина со години
Тројца поранешни градоначалници на Демир Хисар, општина со околу девет илјади жители, се најдоа на „пик“ на Антикорупциската комисија, која покренува иницијатива за нивно кривично гонење поради „злосторничко здружување“.
Освен против тројцата градоначалници, од различни партии, кои биле на функција од 2009 година до лани, ДКСК предлага постапка за кривично гонење и против раководителка на Одделението за урбанизам во Општината, како и нејзиниот сопруг, сопственик на трговско друштво „Амбиент“.
Шемши Салаи, член на ДКСК, образложувајќи го предметот, појасни дека сопругот на раководителката на Одделението за урбанизам Соња Наумовска, закупил простор во сопственост на Општината, а не плаќал закупнина со години. Тоа било толерирано од страна на тројцата поранешни градоначалници Тони Ангеловски, Љупчо Блаженовски и Марјанче Стојановски, пренесува МИА.
По информациите до кои дошла ДКСК, се констатира дека Соња Наумовска и нејзиниот сопруг Раде Наумовски се стекнале со бесправна корист на средства од над милион и 500 илјади (1 502 498) денари по однос на неплатени закупнини, а поранешните градоначалници на општината не презеле должни мерки за наплата на закупот.
Во пријавата, како што беше посочено на седницата, е наведено и дека геодетските елаборати за утврдување на правен статус на бесправно изградени објекти во Демир Хисар ги изработиле фирми чии сопственици биле во блиски деловни односи со поранешниот градоначалник Тони Ангелески, а постоел и договор меѓу раководителката Наумовска и поранешниот градоначалник Марјанче Стојановски дека таа на негови роднини ќе им помагне при легализација на објектите, а за возврат градоначалникот да не постапува за присилна наплата за закупот.
ДКСК го разгледа и предметот отворен по барање на поранешниот градоначалник на Град Скопје, Петре Шилегов поврзан со набавката на мултифункционалната противпожарна скала. Бидејќи за овој случај Обвинителството за гонење на организиран криминал и корупција има отворено кривичен предмет, ДКСК ја запре постапката по овој предмет.
Антикорупциската комисија, на денешната седница, најави и иницијатива за кривично гонење на доскорешниот градоначалник на скопската Општина Гази Баба и на Азем Садики, долгогодишен и актуелен градоначалник на Студеничани.