Потрагата траела околу два часа и во неа учествувале полицајци од Ресен заедно со екипи од Црвениот крст во Охрид
Тројца државјани на САД се изгубиле во Националниот парк „Галичица“ кога тргнале кон истоимениот врв, а по два часа потрага на спасувачките екипи, операцијата завршила успешно.
Вчера попладне околу 15:30 часот 33-годишна Американка пријавила во полиција дека заедно со нејзините сопруг и брат се изгубиле, по што екипите веднаш тргнале во акција.
„Според пријавеното, тие тргнале да планинарат кон врвот Галичица, при што се разделиле и по кратко време се изгубиле. Веднаш по пријавата, полициски службеници од СВР Битола – ОВР Ресен, во содејство со спасувачката служба на Црвен крст од Охрид, извршија пребарување на теренот, при што во 17:30 часот биле пронајдени“,
велат од МВР.
Откако биле пронајдени, екипите ги спуштиле по патеката кон селото Лескоец од каде што со возило биле транспортирани до асфалтниот пат Царина-Трпејца.
На тројцата туристи им бил направен и преглед од екипите од Итната медицинска помош, а откако било констатирано дека се добри тие заминале во местото каде што се сместени во Охрид.