Предлог-законот на Владата за јавното обвинителтво, што треба да ја реши судбината на СЈО, утре влегува во собраниска процедура. За предлогот да „помине“, потребно е двотретинско мнозинство, кое владејачките партии го немаат. Исходот се чини неизвесен, не само затоа што ВМРО-ДПМНЕ веќе ги исцрта своите „црвени линии“, туку затоа што и помалите опозициски партии веќе најавија забелешки.
Пред да почне собраниската расправа, осумтемина независни пратеници од ВМРО ДПМНЕ и коалицијата, заеднички ќе се договорат каква позиција ќе заземат за новиот Закон за јавно обвинителство. Пратеникот Љубен Арнаудов за „360 Степени“, вели дека групата пратеници утре ќе има координција. Додека не се договорат меѓусебно како ќе настапат, предлог-законот не сакаше да го коментира ниту пратеникот Крсто Мукоски.
„Осумката“ независни пратеници ја сочинуваат Сашо Василевски, Љубен Арнаудов, Емилија Александрова, Елизабета Канческа-Милевска, Крсто Мукоски, Нола Исмајлоска–Старова, Зекир Рамчиловиќ и Владанка Авировиќ. Нивната помош беше клучна за власта да обезбеди поддршка за уставните измени за името на државата.
Алијанса и Беса веќе најавија забелешки
Додека „осумката“ гради став, Алијансата за Албанците веќе се изјасни, каков закон би бил добар за нив. Нивните предлози се разликуваат од текстот предложен од власта.
„На чело на ова обвинителство треба да биде обвинител од земјите на Европската Унија и тоа ќе биде голема гаранција за независно обвинителство и во кое ќе веруваат сите политички субјекти и граѓани сметаме дека владата итно треба да создаде услови за реформи во Советот на обвиители и во судскиот совет и да се повлечат сите обвинители кои биле и сега се дел од тие што им служеле на криминалот и корупцијата“,
изјави за Алсат М портпаролот на Алијансата за Албанците Фљакрон Беџети.
Движењето БЕСА подддршката ја условува со датум за предвремени избори.
„Движењето Беса има многу забелешки со неспроведувањето на договорот со Владата за време на уставните измени, како и предлог-законот за јавното обвинителство и предложениот закон за попис на населението. Подготвени сме да дадеме свој придонес за да го отклучиме реформскиот процес, но за возврат од Владата бараме да го утврди датумот на предвремени парламентарни избори, а до тој датум подготвени сме да седнеме и да ги обезбедиме најдобрите решенија што ќе бидат во согласност со препораките на Европската комисија“,
вели Арјанит Хоџа – генералeн секретар на Движењето БЕСА.
Законот за јавно обвинителство кој го предложи премиерот Зоран Заев и за кој верува дека има основа за двотретинско мнозинство, утре влегува во Собрание. Со него се предвидува СЈО да се претопи во обвинителството за организиран криминал и корупција и да се формира ново обвинителство со назив: Основно јавно обвинителство за гонење организиран криминал и висока корупција. Премиерот предлага новото обвинителство да го води актуелната шефица на обвинителството за организиран криминал, обвинителката Вилма Русковска, која е избрана на таа позиција во ноември 2018 година од страна на Советот на јавни обвинители. Кон тоа обвинителство ќе се припојат целокупниот кадар, опрема но и предмети и докази на СЈО.
„Текстот што ќе биде предложен ги вградува оние точки за кои досега сме разговарале и беа барање на опозицијата и за кои сметаме дека можат да бидат прифатливи за најголем дел од пратениците, притоа заштитувајќи ја досегашната работа на СЈО и случаите за кои тоа обвинителство има надлежност… Ги повикувам сите пратеници во Собранието на Република Северна Македонија со сета внимателност да го проследат предлогот и со сета одговорност да ја гарантираат правната држава и владеењето на правото во нашата земја“,
порача Заев.
ВМРО ДПМНЕ иако најавија детална анализа на предложениот закон, веќе реагираат дека за нив е неприфатливо Рускоска да зaстане на чело на новото обвинителство, како и продолжување на постапките во предметите на СЈО, за кои тимот на Катица Јанева не успеа да поднесе обвинение до 30 јуни 2017 година.
Неделава во Скопје пристигнуваат еврокомесарот Јоханес Хан, како и и в.д. помошникот државен секретар на САД за Европа и Евроазија, Филип Рикер. Двете посети коинцидираат со кризата поврзана со СЈО и отпочнувањето на собраниска процедура на новиот предлог-закон за јавното обвинителство. „360 Степени“ минатата недела објави дека се очекува претставниците на ЕУ и на САД да се фокусираат токму на ова прашање што се смета за последно отворено пред земјите-членки на ЕУ во октомври да решаваат за одредување датум за пристапни преговори со С. Македонија.