Домаќинствата што трошат просечно ќе плаќаат една цена, можеби и пониска од сегашната, според првиот човек на РКЕ
Три блока цени (блок-тарифи) на струјата најавува претседателот на Регулаторната комисија за енергетика, Марко Бислимовски. Во вечерашното гостување на „Топ тема“ на Телма, Бислимовски рече дека тоа значи оти домаќинствата што трошат просечно (на месечно ниво) ќе плаќаат една цена, можеби и пониска од сегашната.
„Како што расте потрошувачката кај одредени домаќинства, така ќе расте и цената што ќе ја плаќаат“,
рече Бислимовски.
За тоа што значи просечна потрошувачка, Бислимовски рече дека тоа е статистика и дека дополнително ќе се утврди.
Според него, овој пат нема да се интервенира во евтината тарифа. Односно, останува евтината тарифа по 22 часот и цел ден во недела.
Од 1 јануари годинава, цената на електричната енергија за домаќинствата е зголемена за 9,48 проценти во споредба со лани, а, исто така, беше укината и дневната евтина тарифа од 14 до 16 часот.
РКЕ, рече Бислимовски на Телма, изработи измени на постоечката методологија, со која во услови на драматичен пораст или намалување на цените на нафтените деривати на берзите може да се носи одлука секој ден, односно доколку цената би се зголемила или намалила за повеќе од два денари.
„И по моето гостување тука ќе одржиме седница на која ќе ги разгледаме анализите што се направени и ќе ја информираме јавноста”,
изјави Бислимовски.
Тој појасни дека новата цена на горивата ќе стапи на сила од полноќ, а се базира на методологија која се прави врз основа на котации на берзата во рок од пет дена.
Бислимовски не сакаше да шпекулира за новата цена, ама посочи дека во минатите денови се случува пораст на цената на горивата на светските берзи, особено на дизелот.