Претседателот на Здружението за македонско-бугарско пријателство, Добре Митрев, вели дека држави не признаваат јазици туку признаваат држави, а Бугарија одамна ја призна Македонија
Претседавачот со Националниот комитет на партијата Граѓанско демократска унија (ГДУ), Ѓорѓи Трендафилов, во гостување во емисијата „360 степени“ на ТВ Алсат, прашан да го коментира официјалниот став на Бугарија за македонскиот јазик, одговори дека не верува оти тоа ќе претставува сериозен проблем за изнаоѓање решение меѓу двете земји.
„Мислам дека прашањето за јазикот ќе биде најмал проблем за кој ќе дискутираат Скопје и Софија и сметам дека во голема мера работите ги имаат усогласено. Се разбира, ова е ехо што ние го ловиме за тоа што се случува во Скопје или Софија, но не мислам дека идентификацијата или јазикот ќе биде сериозен камен на сопнување, бидејќи кога државата ја признаваш, тогаш ја признаваш со сите атрибути, добри или лоши“,
вели Трендафилов.
Со сличен став е и претседателот на Здружението за македонско-бугарско пријателство, Добре Митрев, кој истакна дека Бугарија одамна ја признала Македонија, а со тоа и нејзиниот јазик и не верува оти тоа ќе претставува проблем во дијалогот помеѓу Скопје и Софија.
„Нема држава што признава јазик, држава признава држава, а не јазик. Бугарија прва ја призна Република Македонија. Сметам дека со тоа што Бугарија ја признава Македонија како држава, ги признава и сите други институции во неа“,
рече Митрев.
Трендафилов и Митрев беа дел од делегацијата со претставници на ГДУ и на неколку здруженија на Бугарите од Северна Македонија, која кон крајот на октомври во Софија беше примена од државно-владиниот врв на Бугарија. На средбите, тие се пожалија на системска дискриминација и стигматизација и побараа вметнување на Бугарите во Уставот на РСМ како чекор кон решавање на проблемите со кои се соочуваат.