Мора да се води сметка за стабилноста на Фондот, мора да се води сметка за секој пензионер секој месец да си ја добива пензијата која што си ја заслужил, истакна министерката за труд и социјална политика Јованка Тренчевска во гостување на ТВ Сител
По денешниот протест на пензионерите кои бараат линеарно покачување на пензиите од 3 500 денари и зголемување на минималната пензија на 18 000 денари, министерката за труд и социјална политика, Јованка Тренчевска во гостување на ТВ Сител кажа дека не сака да биде популист и да даде линеарно зголемување или зголемување на пензиите коишто ќе ги задоволат пензионерите за да после три-четири месеци ниеден пензионер во државата не земе пензија.
Во однос на новата методологија на пресметка на пензиите која беше усвоена пред година и половина, таа рече дека тоа е системско решение со кое пензиите ќе растат на долг рок.
„За само една година и осум месеци од овој владин состав пензиите пораснаа за 24 отсто. Минималната пензија беше 9000 денари денес е 12.500 денари, тоа е зголемување за 3500 денари. Воспоставивме систем во кој постојано растат пензиите. Оваа методологија кога ја донесовме сите пензионери беа задоволни. Никој не се бунеше. Јасно е кој стои зад организацијата на овие пензионери кога ќе го видите иницијативниот одбор дека се членови на опозициска политичка партија”,
кажа Тренчевска.
Тренчевска нагласи дека барањата на пензионерите ќе бидат разгледани и оти заедно со Сојузот на пензионери ќе се разговара за сите отворени прашања. Според неа, усогласувањето на септемвриската пензија можно е да изнесува и повеќе од шест проценти.
Според Тренчевска, искажаните ставови во однос на зголемувањето на платите на функционерите од 78 проценти, веќе не заслужуваат коментар, посочувајќи дека е тоа одлука на Уставниот суд, и при тоа укажа дека не само Владата туку и локалната самоуправа има обврска да се грижи за граѓаните.
„И јас не се согласувам со покачувањето, меѓутоа тоа е одлука на Уставниот суд, а законот мора да се почитува. Тој што не ја почитува одлуката на Уставниот суд, односно законот, врши кривична одговорност и ако пензионерите се бунат за овие 78 отсто нека одат да протестираат пред Устваниот суд. Само 45 функционери се во Владата, останатите се пратеници, градоначалници, судии и јавни обвинители. Најмал дел се во Владата. Меѓутоа законот е ист за сите”,
изјави министерката.
Инаку, денеска претпладне пензионерите на протест побараа усогласување на пензиите согласно објавените податоци од Државниот завод за статистика во ноември 2021 година, линеарно зголемување од 3 500 денари на основицата на пензијата и минималната пензија да биде 18 000 денари, како и веднаш да се укине Сојузот на здруженија на пензионери.
Како што истакнаа на протестот, Сојузот не ги застапува интересите на пензионерите и затоа побараа да се укине членарината од 30 денари, а средствата за солидарен погреб од 150 денари месечно, наместо во Сојузот, да се плаќаат во Фондот за пензиско и инвалидско осигурување.
Изминатиот период, пензионерите протестираа во своите градови изразувајќи незадоволство од процентуалното зголемување на пензиите.
Минатата година беше донесена нова методологија за пресметка на пензиите согласно која сега во септември пензиите треба да се зголемат за шест проценти.