Мајката има пет месеци мајчинско и четири месеци родителско отсуство, значи останува со детето исто како и досега – девет месеци. Но, дополнително, тука се и 4 месеци на родителско отсуство на таткото, кои доколку се користат од страна на таткото по истекот на мајчинското и родителското отсуство на мајката, значи дека детето, наместо досегашните 9 месеци, ќе може да биде под родителска грижа вкупно 13 месеци“, напиша министерката за труд и социјална политика на Фејсбук, појаснувајќи ги новините во предлог-законот за работни односи, кој се уште е во нацрт-верзија, а воедно негирајќи ги шпекулациите што се појавија на социјалните мрежи дека со измените се скратува породилното отсуство на мајката
Министерката за труд и социјална политика, Јованка Тренчевска денеска ги негираше шпекулациите дека со новиот предлог-закон за работни односи, кој сè уште е во нацрт-верзија се крати отсуството на мајката од работа поради раѓање дете од сегашните девет на пет месеци. Таа, во изјава за медиумите, појасни дека породилното отсуство на мајката останува исто, односно девет месеци, а со новиот предлог-закон се предвидува можност родителско отсуство од работа поради раѓање дете во траење од четири месеци да користи и таткото.
„Ова што излезе на социјалните мрежи за отсуството за раѓање не е вистина. Станува збор за шпекулација односно не целосно прикажување на измените во новиот текст од законот за работни односи затоа што не се скратуваат на мајката тие сегашни девет месеци туку напротив се додава можност таткото да користи право за родителско отсуство заради раѓање на дете“,
изјави Тренчевска во вестите на Канал 5 ТВ.
Таа додаде дека очекува до средината на февруари да заврши јавната дебата околу предлог-законот, а потоа тој да влезе во владина, а потоа и во собраниска процедура. „
Очекуваме до средината на февруари да завршат овие јавни дебати, да ги собереме коментарите, препораките, предлозите од овие јавни расправи. Она што е конструктивно да се вгради во текстот на законот и до крајот на февруари тој да влезе во владина процедура. Откако ќе биде разгледан и усвоен од Владата да го пратиме во собраниска процедура“,
изјави министерката за труд и социјална политика.
Тренчевска дополнително појаснување на измените на законот за работни односи даде и во објава на „Фејсбук“.
Наместо досегашното породилно отсуство, напиша таа, со измените се предвидува поделба на отсуствата на мајчинско, татковско и родителско отсуство.
„Татковското е во траење од 15 дена и се користи веднаш по раѓањето на детето, ако е едно дете, а за близнаци, тројки и повеќе родени деца, во траење од 20 дена. Мајчинското отсуство трае 5 месеци, а родителското по четири месеци за секој родител поединечно“,
наведува министерката.
Иако на прв поглед, пишува таа, изгледа дека е намален периодот на мајчинско отсуство, сепак не е така, бидејќи мајката има пет месеци мајчинско и четири месеци родителско отсуство, значи останува со детето исто како и досега – девет месеци.
„Но, дополнително, тука се и 4 месеци на родителско отсуство на таткото, кои доколку се користат од страна на таткото по истекот на мајчинското и родителското отсуство на мајката, значи дека детето, наместо досегашните 9 месеци, ќе може да биде под родителска грижа вкупно 13 месеци“,
појаснува министерката за труд и социјална политика.
Воспоставувањето на трите вида на отсуство, додава таа, освен обезбедување на заштита, имаат за цел и изедначување на улогата на мајката и таткото, односно мажот и жената во периодот на подигање на детето или децата.