По написите на странските медиуми дека лидерот на Северна Кореја, Ким Џонг-ун, е во лоша здравствена состојба, се огласи и претседателот на САД, Доналд Трамп.
Тој на новинарско прашање поврзано со состојбата на Ким рече дека му посакува добро здравје, иако не е сигурен дека тоа е точно.
*Поврзана вест: Си-ен-ен: Лидерот на Северна Кореја во критична состојба?
„Се појавија такви извештаи, но ние не знаеме. Имам многу добри односи со него. Можам само да кажам дека му посакувам да оздрави бидејќи ако неговата состојба е таква како што објавија медиумите тоа е многу сериозно. Му посакувам и многу среќа“,
наведе Трамп.
Тој додаде дека се уште никој не ги потврдил медиумските наводи, а Си-ен-ен прв објави таква вест.
„Кога Си-ен-ен ќе објави нешто, немам големи надежи во тоа“,
посочи Трамп.
Си-ен-ен вчера објави дека САД ги следат информациите на тајните служби според кои лидерот на Северна Кореја е во критична состојба по операцијата на срцето.
Шпекулациите за неговата здравствена состојба беа поттикнати откако Ким не се појави на одбележување на роденденот на неговиот дедо на 15 април. Тој последен пат е виден на 11 април на владина седница.
Јужнокорејските медиуми објавија дека на севернокорејскиот лидер на 12 април му била извршена операција на срце. Според неофицијални информации, тој по операцијата е сместен во вила во Хујангсан и е под лекарска контрола.
Северна Кореја строго ги контролира информациите, посебно за Ким, кој во земјата има статус на божество.