Во светот сме меѓу првите земји по раст на цените за храна. Тоа значи дека нашите граѓани најбрзо и најмногу осиромашуваат во споредба со другите, велат од опозициската партија
Платите и пензиите ја изгубија битката со цените, реагираат од опозициската ВМРО-ДПМНЕ откако од владејачкиот СДСМ на прес-конференција најавија дека во март ќе има нови покачувања на пензиите и минималната плата.
„Според прес-конференцијата на Кузеска се добива впечаток дека СДС уште ги држи прославата од Нова година. Стандардот на граѓаните поради лошите политики на СДС е паднат на најниско ниво. Платите и пензиите ја изгубија трката со цените. Тоа што можело да се купи со илјада денари, денес не може да се купи со две илјади. Македонија се соочува со највисока инфлација во регионот и една од највисоките во Европа. Во светот сме меѓу првите земји по раст на цените за храна. Тоа значи дека нашите граѓани најбрзо и најмногу осиромашуваат во споредба со другите“,
велат од ВМРО-ДПМНЕ.
Од опозицијата обвинуваат дека сме на дното во регионот и по странски инвестиции, како и дека според извештајот на Светска банка, Македонија ја завршила 2022 година со раст на БДП кој е најлош во регионот и еден од најлошите во Европа.
„Поради неуспешните економски политика огромен број од младите сакаат да ја напуштат Македонија. Ете тоа е резултатот на власта на СДС и ДУИ. Тоа мора да престане. Власта мора да се промени“,
додаваат од ВМРО-ДПМНЕ.
Од СДСМ, пак, денеска оценија дека досега биле спроведени успешни мерки и политики и оти 2023 ќе биде година на економски пресврт во која во март ќе има од 6-7 отсто зголемување на пензиите и за 10 отсто зголемување на минималната плата која ќе изнесува околу 20 000 денари.