Франција со оптимизам гледа на извештајот на Европската комисија, како и на методологијата за проширување како охрабрувачка основа за донесување одлука за старт на преговорите на ЕУ со Северна Македонија, истакнал францускиот амбасадор Кристијан Тимоние на денешната средба со премиерот Оливер Спасовски.
Како што соопшти владината прес-служба, Спасовски истакнал дека извештајот завршува со уште една препорака за почеток на преговорите и дека тоа е резултат на посветената работа и во периодот на актуелната влада, во кој се затворија неколку важни реформски прашања, меѓу кои и пакетот закони за правосудството.
Премиерот Спасовски изразил благодарност до сите што учествуваа во процесот за да се остварат постигнувањата констатирани во извештајот на Европската комисија, особено до земјите членки на ЕУ и пријатели на Северна Македонија кои го охрабруваат мерит-системот во оценките за напредокот на земјите кандидати за членство во ЕУ.
На средбата било потенцирано дека извештајот, заедно со новата методологија за проширување му дава на процесот на преговори и на пристапување кон членство во ЕУ кредибилност и претставува добра порака за регионот, се вели во соопштението.