Во земјава има околу 2 500 дијагностицирани пациенти со МС, а само во текот на 2025 година биле регистрирани 115 нови случаи
Буџетот за лекови за МС за 2026 година е зголемен и достигнува 451 милион денари, што ќе овозможи терапија за повеќе од 1 020 пациенти, наспроти 961 пациент во 2025 година
Започнува процесот на децентрализација на добивањето третман и терапија за пациентите со мултипла склероза (МС), преку отворање на три регионални центри, информира денеска директорот на Фондот за здравствено осигурување (ФЗО), Сашо Клековски, на одбележувањето на Светскиот ден на мултипла склероза во Скопје.
Од Националното здружение за МС посочија дека станува збор за долгогодишно барање на пациентите, кое сега започнува да се реализира како пилот-проект во три јавни здравствени установи, како ЈЗУ Градската општа болница „8 Септември“, ЈЗУ Клиничката болница – Штип и ЈЗУ Специјализираната болница за ортопедија и трауматологија „Св. Еразмо“ во Охрид.
Центрите ќе ги покриваат пациентите од Источна, Североисточна и од Југозападна Македонија.
Клековски истакна дека Фондот обезбедил зголемен наменски буџет за поддршка на зголемените потреби на пациентите со МС и нагласи дека ветувањето дадено минатата година е исполнето благодарение на соработката меѓу ФЗО, Здружението и Клиниката за неврологија.
„Доколку пилот-фазата ги даде очекуваните резултати, децентрализацијата ќе продолжи и во други градови, со што терапијата ќе им биде подостапна на пациентите и ќе се намалат патувањата и дополнителните трошоци“,
велат од Здружението.
Претседателката на Националното здружение за МС, Ана Карајанова Димитрушева, порача дека лицата што живеат со оваа болест веќе не се сами во својата борба и повика на поголема солидарност и поддршка.
В.д. директорот на ЈЗУ Универзитетска клиника за неврологија, Јован Божиновски, презентираше податоци според кои во земјава има околу 2 500 дијагностицирани пациенти со МС, а само во текот на 2025 година биле регистрирани 115 нови случаи.
Најави дека Клиниката работи на набавка на нов апарат за магнетна резонанца, кој треба значително да го забрза поставувањето дијагноза и следењето на болеста. Според него, буџетот за лекови за МС за 2026 година е зголемен и достигнува 451 милион денари, што ќе овозможи терапија за повеќе од 1 020 пациенти, наспроти 961 пациент во 2025 година.
„Во согласност со светските медицински трендови, речиси 600 пациенти се на третман со високоефикасна модифицирачка терапија, со што директно се спречуваат релапси и долгорочен инвалидитет“,
рече тој.
Посебно внимание на настанот привлече и истражувањето презентирано од Слободанка Бурнеска Саздова од Клиниката за неврологија, кое се однесува на планирањето семејство кај жените со МС во Македонија. Резултатите покажале дека голем дел од пациентките се соочуваат со страв од влошување на состојбата по бременост и се чувствуваат недоволно информирани, иако имаат силна желба да станат мајки.
Како одговор на овие резултати, Националното здружение за МС промовираше локализирана едукативна брошура за планирање семејство кај пациентки со мултипла склероза.
Во рамките на одбележувањето на Денот на МС е најавено и дека Археолошкиот музеј на Македонија ќе биде осветлен во портокалова боја до крајот на неделата, како симбол на поддршка на лицата со мултипла склероза.