Нејзините производители ја истакнуваат цената од три до четири долари по доза и тоа што не мора да се чува на многу ниски температури
Вакцината против коронавирусот, која ја развива Универзитетот во Оксфорд во соработка со „Астра Зенека“, ќе биде достапна за целиот свет бидејќи ќе чини само помеѓу три-четири долари, објави британскиот весник „Телеграф“.
„Додека ‘Фајзер’ и ‘Модерна’ објавија дека успешно ја завршиле третата фаза од тестирањето, британскиот тим потенцира дека нивната првична цел е да го направат нивниот производ достапен за целата планета. Не станува збор само за вакцина што ќе може да се транспортира и да се чува на нормални температури, туку и да биде достапна за секого“,
пишува „Телеграф“.
Целта поставена од научниците од Оксфорд и „Астра Зенека“ е вакцината да им биде достапна на посиромашните земји во светот.
„По цена од само три до четири долари по доза, вакцината на Оксфорд е само мал дел од цената на вакцината ‘Фајзер’ и ‘Модерна’, која ќе се продава од 20 до 32 долари, што е скапо за многу земји во развој“,
пишува „Телеграф“.
Директорот на тимот што ја направи вакцината во Оксфорд, Ендру Полард, уште ја нарече „вакцина за светот“.
„Нашата цел беше вакцината да ја направиме достапна насекаде. Мислам дека успеавме да го сториме тоа“,
рече Полард.
Фармацевтската компанија „Астра Зенека“ вчера објави дека нејзината експериментална вакцина против коронавирус покажала просечна ефикасност од 70% во спроведените големи испитувања на компанијата, што е последно од неколкуте испитувања за вакцини ширум светот, кои ги објавија неколку други компании овој месец.
Вакцината, развиена во соработка со Универзитетот во Оксфорд, покажала 90% ефикасност при вакцинирање со една доза, односно кога вакцината е дадена прво како половина доза, проследена со целосна доза најмалку еден месец подоцна. Во вториот режим на вакцинирање, кога се дадени две целосни дози во растојание од еден месец, ефикасноста била 62 отсто.
Или во просек до 70 отсто ефикасност, соопштија од „Астра Зенека“.
Минатата недела оваа компанија објави дека вакцината покажала силен имунолошки одговор кај лицата на возраст над 60 години, кои се изложени и на најголем ризик од вирусот.
Денешната вест следува откако на почетокот на овој месец две американски компании, „Модерна“ и „Фајзер“ објавија дека нивните вакцини се ефикасни до 95 отсто.
Вчера и германската компанија „ИДТ биологика“ објави дека планира до крајот на годината да ја почне втората фаза од тестирањето на експерименталната вакцина против коронавирусот.
Британските медиуми, кои го цитираат извршниот директор на компанијата, Јирген Бечинг, објавуваат дека прогнозите се дека вакцината ќе биде одобрена во 2021 година.
Во меѓувреме, и Кина објави дека речиси еден милион луѓе досега ја примиле експерименталната вакцина што ја развива кинеската фармацевтска компанија „Синофарм“ во рамки на итната програма одобрена од кинеската влада.
Поблиску до вакцина: И Кина објави позитивни резултати од експерименталната имунизација