Техничката влада која беше изгласана вчера во Собрание денеска ја одржа и првата седница на која се определени вицепремиерите како и порфолијата на министрите без ресор.
Во споредба со владата на Зоран Заев во која имаше пет, во техничката на Оливер Спасовски има еден вицепремиер помалку, додека кај министрите без ресор нема никакви промени.
Вицепремиери остануваат Радмила Шекеринска, Бујар Османи и Садула Дураки. Во владата повеќе не е Кочо Анѓушев, но на негово место сега е Мила Царовска. Испразнето останува само вицепремиерското место кое го имаше Спасовски, кој сега е премиер.
Царовска исто така е именувана и за претседателка на Комисијата за економски систем и тековна економска политика, Радмила Шекеринска на Комисијата за политички систем, а Бујар Османи на Комисијата за човечки ресурси и одржлив развор.
Во техничката влада ВМРО-ДПМНЕ има две министерски позиции. Министер за внатрешни работи е Наќе Чулев, а министерка за труд и социјална политика е Рашела Мизрахи.
Драги Рашковски повторно е именувам за генерален секретар, а за негов заменик Таки Хани.
Во однос на министрите без ресор и нивните портфолија нема никакви промени.
Роберт Поповски останува министер без ресор задолжен за комуникации, отчетност и транспарентност, Едмонд Адеми за дијаспора, Музафер Бајрам за имплементација на Стратегијата за подобрување на состојбата на Ромите, Зорица Апостолска за странски инвестиции, Бардул Даути за странски инвестиции, Елвин Хасан за странски инвестиции и Хисен Џемаили за подобрување на инвестициската клима за домашните претпријатија.