Драганчо Златанов, таткото на четиригодишното девојче, кое е првиот пациент со Ковид 19 од Штип, се јави од Англија и за МИА информираше дека неговото дете и сопруга во земјава се пристигнати на 14 март без никакви симптоми на болеста. Тој вели дека доколку неговото дете и сопруга имале какви било симптоми ќе останале во Англија и немало да дојдат во земјава и да го загрозат здравјето најпрвин на потесното семејство, а потоа и на сите останати околу нив.
„Одговорно ви тврдам дека од градинката во Англија добивме и-маил во вторникот, во којшто не известуваат да се прегледаме, бидејќи имаат регистрирано случај на заболен родител на дете во градинката, каде што беше згрижена и мојата ќерка. Моето дете не е дојдено од Англија со симптоми, како што тврдат одредени медиуми или како што ги гледам коментарите на социјалните мрежи. Ние сме британски државјани и имаме здравствено осигурување и во Англија. Револтиран сум што секакви дезинформации има околу нашиот случај“,
вели Златанов.
Тој бара да престанат, ако што вели, дезинформациите, шпекулациите и говорот на омраза за и околу нивниот случај. Откако ја добиле електронската пошта од градинката неговата сопруга веднаш побарала да се тестираат во Центарот за јавно здравје-Штип, тврди Златанов.
Тој додава дека изминатите денови неговото детето било во самоизолација и дека не е излезено од домот. Златанов вели дека од неговото семејство покрај неговата ќерка, позитивна е и една од бабите, а од синоќа и неговата сопруга и нејзиниот татко. Според него, семејството не е дојдено во Штип за да биде на товар на македонскиот здравствен систем, како што од завчера ги слуша и гледа коментарите на одредени медиуми и на социјалните мрежи. Вели дека финансиите не се проблем за нив, дека во Англија имаат хотел и сопствена такси компанија и се здравствени осигуреници на Англија која, според него, дава врвна здравствена заштита.