Новите четворица директори ја надополнуваат листата на први луѓе во здравствените установи кои министерот за здравство Арбен Таравари ги назначи изминатите денови
Четири здравствени установи имаат нови в.д. медицински директори што се именувани од министерот за здравство Арбен Таравари.
Тројца директори се именувани на установи кои се дел од комплексот клиники „Мајка Тереза“, а четвртиот е на Градската општа болница „8 Септември“.
Педијатарот Реџеп Мемеди е назначен за в.д. директор на Клиниката за детски болести. Тој доаѓа на местото на досегашната директорка Валентина Цвејоска-Чолаковска.
На Универзитетска клиника за дигестивна хирургија за в.д. директор е именуван проф. д-р Огнен Костовски.
Доктор Оливер Зафировски е назначен за в.д. директор на Универзитетска клиника за пулмологија и алергологија, кој ќе го замени досегашниот директор Дејан Докиќ.
Нов в.д. директор, Таравари именувал и во Градската општа болница „8 Септември“. За директор во оваа установа е именуван проф. д-р Синиша Стојаноски кој доаѓа на местото на Христијан Костов.
Нов директор минатата недела доби и скопска Гинекологија, каде што на местото на Викторија Јовановска, која со оваа клиника раководеше речиси седум години, сега е поставена Ирена Алексиоска-Папестиев.
Покрај на Гинекологија, министерот за здравство Арбен Таравари минатата недела постави нови директори на повеќе клиники.
На Универзитетската клиника за уво нос и грло е именуван Игор Камшикоски, на Универзитетската клиника за дерматологија Катерина Дамевска, на Универзитетскиот институт за радиологија Соња Николова, додека на Универзитетската клиника за ендокринологија, дијабетес и метаболични нарушувања – Танер Хасан.
Д-р Небојша Настов е нов в. д. директор на Клиниката за хируршки болести „Св. Наум Охридски“, а д-р Злате Мехмедовиќ на Клиниката за физикална медицина и рехабилитација.
Клиниката за психијатрија ќе ја раководи д-р Славица Арсова-Хаџиангелковска, а за директор на Клиниката за гастроентерохепатологија е именувана д-р Мери Трајковска, на Нефрологија е д-р Никола Ѓоргиевски, а на Ревматологија е д-р Емилија Сандевска.
Министерот Таравари го именува Арѓент Муча за директор на Општата болница „Д-р Ферид Мурад“-Гостивар.