„Онкологија е еден пример што го фативме. ‘Онкологии’ можеби има во повеќе болници и клиники, меѓутоа не сакам да зборувам со предрасуди, сакам да поставиме стандарди за да спречиме секаква злоупотреба“, изјави денеска министерот за здравство
Поголема дигитализација во здравството за да се избегнат манипулации со пропишувањето лекови и користењето на медициските услуги, најави министерот за здравство во новата влада, Арбен Таравари, за да не ни се повторуваат, како што вели, случаи како оној на Клиниката за онкологија.
Министерот ова го кажа одговарајќи на новинарски прашања за време на денешната посета на Клиничката болница во Тетово, информирајќи дека се работи на изнаоѓање на среднорочно и долгорочно решение во однос на дигитализацијата во здравството.
Сепак, вели оти му е потребно време за да се консултира со експерти од областа на информатичките технологии.
„Работиме на изнаоѓање на среднорочно и на долгорочно решение. Зборувам за дигитализација, можеби и за кодирање на сите лекови коишто ќе доаѓаат во Македонија. Меѓутоа дајте ми време да се консултирам и со ИТ-инженери и со луѓе кои се разбираат во ова. Има држави каде добрата дигитализација направила револуција, огромни заштеди во здравството. Ние постојано се повикуваме на борба против корупција и криминал, јас ќе инсистирам што поскоро да започнеме со дигитализација во Македонија“,
изјави Таравари.
Говорејќи на темата, министерот рече оти е јавна тајна дека некои луѓе ги земаат лековите од матичен доктор, а потоа ги носат во приватни аптеки и ги продаваат.
„Онкологија е еден пример што го фативме. ‘Онкологии’ можеби има во повеќе болници и клиники, меѓутоа не сакам да зборувам со предрасуди, сакам да поставиме стандарди за да спречиме секаква злоупотреба“,
додаде министерот за здравство.
За потестување, Основното јавно обвинителство Скопје по неколкумесечна предистражна постапка на почетокот на оваа година отвори истрага за скандалот со пропишувањето лекови на Клиниката за онкологија и радиотерапија, кој избувна лани летото.
Во случајот осомничени се тогашниот медицински директор на Клиниката, Нино Васев, и организацискиот директор на Онколгија во периодот од 2021 до април 2023 година, Нехат Нухи, како и тројца лекари онклози. Како што информираа тогаш од Обвинителството осомничените директори набавувале лекови на реверс, без согласност на Фондот за здравствено осигурување и без спроведена постапка за јавна набавка и на тој начин се создавал вишок лекови за кои не се водела евиденција. Дополнително на пациенти им била пропишувана вишок терапија, а на некои пациенти им била издавана скапа терапија од најновата генерација еден ден пред да починат.
Обвинителството, како што информираа тогаш оттаму, во истрагата до тој момент утврдило дека во случајот е сторена имотна корист за друг во износ од 1 817 520 000 или близу 30 милиони евра. Обвинителката Ана Гоговска-Јакимовска која го води случајот, во интервју за емисијата „Код“ на ТВ Телма во февруари изјави дека од доказите кои ОЈО Скопје ги прибавило и анализирало во предистражната постапка за случајот не упатуваат на директна злоупотреба на пациентите, во смисла дека им биле кратени лекови и терапии.
Случајот „Онкологија“ сè уште е во фаза на истрага.